ത്വാഹിറുല്‍ അഹ്ദല്‍ ഉറൂസിന് കൊടിയുയര്‍ന്നു:മുഹിമ്മാത്ത് സനദ് ദാന സമ്മേളനം നാളെ
പുത്തിഗെ : മുഹിമ്മാത്ത് സ്ഥാപന സമുച്ചയത്തിന്റെ ശില്പി സയ്യിദ് ത്വാഹിറുല്‍ തങ്ങളുടെ പത്തൊമ്പതാമത് ഉറൂസ് മുബാറകിന് കൊടിയുയര്‍ന്നു. മുഹിമ്മാത്ത് സ്ഥാപനങ്ങളില്‍ നിന്ന് പഠനം പൂര്‍ത്തിയാക്കിയ 35 യുവ പണ്ഡിതര്‍ക്ക് നല്‍കുന്ന സനദ് ദാന സമ്മേളനം നാളെ രാത്രി 7.30ന് കേരള മുസ്ലിം ജമാഅത്ത് ജന സെക്രട്ടറി ബദറുസ്സാദാത്ത് സയ്യിദ് ഇബ്രാഹിം ഖലീല്‍ അല്‍ ബുഖാരി തങ്ങള്‍ ഉത്ഘാടനം ചെയ്യും. ഇന്ത്യന്‍ ഗ്രാന്‍ഡ് മുഫ്തി കാന്തപുരം എ പി അബൂബക്കര്‍ മുസ്ലിയാര് സനദ് ദാന പ്രഭാഷണം നടത്തും. പേരോട് അബ്ദുല്‍ റഹ്‌മാന്‍ സഖാഫി, എ പി അബ്ദുല്ല മുസ്ലിയാര് മാണിക്കോത്ത്, സയ്യിദ് ഹസനുല്‍ അഹ്ദല്‍ തങ്ങള്‍, കൊമ്പം മുഹമ്മദ് മുസ്ലിയാര് , വി പി എം ഫൈസി വില്യാപ്പള്ളി പ്രസംഗിക്കും. എസ് എസ് എഫ് സംസ്ഥാന പ്രസിഡന്റ് സയ്യിദ് മുനീര്‍ അഹ്ദല്‍ തങ്ങള്‍ ആമുഖ പ്രഭാഷണം നടത്തും.
ഇച്ചിലങ്കോട് മാലിക്ദീനാര്‍ മഖാം സിയാറത്തിന് സയ്യിദ് മുഹമ്മദ് മദനി തങ്ങള്‍ മൊഗ്രാല്‍ നേതൃത്വ നല്‍കി. മുഗുറോഡില്‍ നിന്നും മുഹിമ്മാത്തിലേക്ക് നടന്ന വിളംബര ഘോഷ യാത്രക്ക് ശേഷം അഹ്ദല്‍ മഖാമില്‍ സിയാറത്ത് നടന്നു. തുടര്‍ന്ന് സ്വാഗത സംഘം ചെയര്‍മാന്‍ സയ്യിദ് പി എസ് ആറ്റക്കോയ പഞ്ചിക്കല്‍ പതാക ഉയര്‍ത്തി. ദൗറത്തുല്‍ ഖുര്‍ആന്‍ ചടങ്ങിന് സൈനുല്‍ ഉലമ അബ്ദുല്‍ ഹമീദ് മുസ്ലിയാര് നേതൃത്വം നല്‍കി. കര്‍ണാടക സ്പീക്കര്‍ യു ടി ഖാദിര്‍ ഉദ്ഘാടനം ചെയ്തു.
നാളെ രാവിലെ 8 മണിക്ക് നടക്കുന്ന ഹജ്ജ് പഠന പ്രാക്ടിക്കല്‍ ക്ലാസിന് അബ്ദുല്‍ കരീം സഖാഫി ഇടുക്കി നേതൃത്വ നല്‍കും. വൈകിട്ട് 3 മണിക്ക് സാംസ്കാരിക സമ്മേളനം നടക്കും. രാജ്മോഹന്‍ ഉണ്ണിത്താന്‍ എം പി, എം എല്‍ എ മാരായ എ കെ എം അശ്‌റഫ്, എന്‍ എ നെല്ലിക്കുന്ന്, സി എച് കുഞ്ഞമ്പു തുടങ്ങിയവര്‍ അതിഥികളാവും. തുടര്‍ന്ന് ഹിഫ്‌ള്, ശരീഅ വിദ്യാര്‍ത്ഥികളുടെ സ്ഥാന വസ്ത്ര വിതരണ ചടങ്ങ് നടക്കും. മുഹമ്മദലി സഖാഫി തൃക്കരിപ്പൂര്‍ ഉത്ഘാടനം ചെയ്യും.
വെള്ളിയാഴ്ച രാത്രി ഏഴ് മണിക്ക് കൂറ്റമ്പാറ അബ്ദുല്‍ റഹ്‌മാന്‍ ദാരിമി പ്രസംഗിക്കും.
8ന് (ശനി) രാവിലെ തമിഴ് പ്രധിനിധി സമ്മേളനം സയ്യിദ് ഹബീബ് അഹ്ദല്‍ തങ്ങളുടെ അധ്യക്ഷതയില്‍ കമാല്‍ സഖാഫി ചെന്നൈ ഉത്ഘാടനം ചെയ്യും.
അഞ്ച് ദിനം നീളുന്ന ആത്മീയ സാംസ്കാരിക പരിപാടികള്‍ ഞായറാഴ്ച രാത്രി നടക്കുന്ന അഹ്ദലിയ്യ ആത്മീയ സമ്മേളനത്തോടെ സമാപിക്കും.
