വടക്കഞ്ചേരി അപകടം; ടൂറിസ്റ്റ് ബസ് ഓടിച്ചിരുന്ന ഡ്രൈവര് ഒളിവില്, വ്യാജ പേരില് ചികിത്സ തേടി
വടക്കഞ്ചേരി അപകടത്തില് ടൂറിസ്റ്റ് ബസ് ഓടിച്ചിരുന്ന ഡ്രൈവര് ജോമോന് ഒളിവിലെന്ന് പൊലീസ്. അപകടത്തിനു പിന്നാലെ ഇയാള് ജോജോ എന്ന വ്യാജ പേരില് വടക്കഞ്ചേരി നായനാര് ആശുപത്രിയില് ചികിത്സ തേടി തേടി. ബസ് അപകടത്തില് പരുക്കേറ്റു എന്ന് നുണ പറഞ്ഞാണ് ഇയാള് ആശുപത്രിയിലെത്തിയത്. പ്രാഥമിക ചികിത്സ തേടിയ ശേഷം ഡ്രൈവര് സ്ഥലം വിടുകയായിരുന്നു. 2.50ഓടെ എത്തിയ ഇയാള് നാലരയോടെ മടങ്ങി. ബസ് ഉടമകള് തന്നെയാണ് ഇയാളെ കൂട്ടിക്കൊണ്ടുപോയതെന്ന് ആശുപത്രി അധികൃതര് പറയുന്നു. ഇയാള്ക്കായി തെരച്ചില് ശക്തമാക്കിയിരിക്കുകയാണ്. ഇയാള് ആശുപത്രിയിലെത്തുന്ന ദൃശ്യങ്ങള് സിസിടിവിയില് പതിഞ്ഞിട്ടുണ്ടെന്നാണ് വിവരം.
ബസ് വേളാങ്കണ്ണി ട്രിപ്പ് കഴിഞ്ഞാണ് എത്തിയതെന്നും ഡ്രൈവര് ക്ഷീണിതനായിരുന്നെന്നും അപകടത്തില്പ്പെട്ട വിദ്യാര്ത്ഥിയുടെ രക്ഷിതാവ് മാധ്യമങ്ങളോട് പ്രതികരിച്ചിരുന്നു. ‘6.30 ആയപ്പോഴാണ് ബസ് പുറപ്പെട്ടത്. ആ സമയത്ത് ഞാന് ബസിനകത്ത് കയറി നോക്കിയിരുന്നു. വേളാങ്കണ്ണി ട്രിപ്പ് കഴിഞ്ഞെത്തിയതായിരുന്നു ടൂറിസ്റ്റ് ബസ്. ഡ്രൈവര് നല്ലവണ്ണം വിയര്ത്ത് കുളിച്ച്, ക്ഷീണിച്ച അവസ്ഥയിലായിരുന്നു. ശ്രദ്ധിച്ച് ഓടിക്കണമെന്ന് പറഞ്ഞപ്പോള്, നല്ല എക്സ്പീരിയന്സുണ്ട്, നന്നായി ഓടിച്ചോളാം എന്നാണ് അയാള് പറഞ്ഞത്. കാസറ്റ് ഇടാന് കുട്ടികള് ചെന്നപ്പോഴും നല്ല സ്പീഡായിരുന്നെന്നാണ് അറിഞ്ഞത്. കുട്ടികളും പറഞ്ഞിരുന്നു, ചേട്ടാ നല്ല സ്പീഡാണ്. പതുക്കെ പോയാല് മതിയെന്ന്”. രക്ഷിതാവ് പറഞ്ഞു.
50-ല് അധികം പേര്ക്കാണ് അപകടത്തില് പരുക്കേറ്റത്. 38 കുട്ടികളാണ് തൃശൂര് മെഡിക്കല് കോളജ് ആശുപത്രിയില് ചികിത്സ തേടിയത്. ടൂറിസ്റ്റ് ബസിലുണ്ടായിരുന്നത് എറണാകുളം ബസേലിയോസ് വിദ്യാനികേതന് സ്കൂളില് നിന്ന് ഊട്ടിയിലേക്ക് വിനോദയാത്ര പുറപ്പെട്ട സംഘമാണ്. 37 വിദ്യാര്ത്ഥികളും അഞ്ച് അധ്യാപകരും രണ്ട് ബസ് ജീവനക്കാരുമാണ് ബസിലുണ്ടായിരുന്നത്. ടൂറിസ്റ്റ് ബസ് അമിത വേഗതയിലായിരുന്നെന്ന് ദൃക്സാക്ഷികള് പറയുന്നു. കെഎസ്ആര്ടിസി ബസും ടൂറിസ്റ്റ് ബസും തമ്മില് കൂട്ടിയിടിച്ചാണ് അപകടമുണ്ടായത്.
അമിത വേഗതയില് വന്ന ടൂറിസ്റ്റ് ബസ് കെഎസ്ആര്ടിസി ബസിന്റെ പിന്നില് ഇടിക്കുകയായിരുന്നു. പിന്നീട് ബസ് ചതുപ്പിലേക്ക് മറിഞ്ഞു. കൊട്ടാരക്കരയില് നിന്ന് കോയമ്പത്തൂരിലേക്ക് പോകുകയായിരുന്ന കെഎസ്ആര്ടിസി ബസാണ് അപകടത്തില്പ്പെട്ടത്.