സാമൂഹ്യ പ്രതിബദ്ധതയുള്ളസമൂഹ സൃഷ്ടിപ്പിന് മതപണ്ഡിതര്‍മുന്നിട്ടിറങ്ങുക; കുമ്പോല്‍ തങ്ങള്‍
കാസര്‍ഗോഡ് : ആത്മീയത, വിദ്യാഭ്യാസം, തൊഴില്‍, സാന്ത്വനം തുടങ്ങിയ മേഖലകളില്‍ ഊന്നി നിന്നു കൊണ്ട് സാമൂഹ്യ പ്രതിബദ്ധതയുള്ളവരും സംസ്‌കൃതരുമായ ഒരു സമൂഹ സൃഷ്ടിപ്പിനായി പണ്ഡിതര്‍ സദാ കര്‍മ നിരതരാവണമെന്ന് സമസ്ത ഉപാധ്യക്ഷന്‍ സയ്യിദ് കെ എസ് ആറ്റക്കോയ തങ്ങള്‍ കുമ്പോല്‍ ആഹ്വാനം ചെയ്തു.
രാജ്യത്ത് സമുദായ ഐക്യവും മതസൗഹാര്‍ദ്ദവും നിലനില്‍ക്കണം. രാജ്യത്തിന്റെ മഹത്തായ പൈതൃകം നശിപ്പിക്കാന്‍ അനുവദിച്ച് കൂട. വര്‍ഗീയതയും തീവ്രവാദ ചിന്തകളും മാറ്റിവെച്ച് മുഴുവന്‍ ജന വിഭാഗങ്ങളും തോളോട് തോള്‍ ചേര്‍ന്ന് പ്രവര്‍ത്തിക്കുമ്പോഴാണ് സമൂഹം നന്മ കൈവരിക്കുന്നത്. അതിന് മതപണ്ഡിതര്‍ മുന്നിട്ടിറങ്ങണമെന്നും കുമ്പോല്‍ തങ്ങള്‍ ആവശ്യപ്പെട്ടു. സമസ്ത കേരള ജംഇയ്യത്തുല്‍ ഉലമ ജില്ലാ പണ്ഡിത പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
പുത്തിഗെ മുഹിമ്മാത്തില്‍ നടന്ന പണ്ഡിത സമ്മേളനത്തില്‍ എ പി അബ്ദുല്ല മുസ്ലിയാര് മാണിക്കോത്ത് അധ്യക്ഷത വഹിച്ചു. സയ്യിദ് അഷറഫ് അസഖാഫ് ആദൂര്‍ തങ്ങള്‍ താഹിറുല്‍ അഹ്ദല്‍ മഖാം സിയാറത്തിന്ന് നേതൃത്വം നല്‍കി.
സയ്യിദ് ഹസനുല്‍ അഹ്ദല്‍ തങ്ങള്‍ പ്രാരംഭ പ്രാര്‍ത്ഥന നടത്തി. പൊന്മള മുഹിയുദ്ദീന്‍ കുട്ടി ബാഖവി,
മുഹമ്മദലി സഖാഫി തൃക്കരിപ്പൂര്‍, അലവി സഖാഫി കൊളത്തൂര്‍ തുടങ്ങിയവര്‍ വിഷയാവതരണം നടത്തി. കാട്ടിപ്പാറ അബ്ദുല്‍ ഖാദര്‍ സഖാഫി പ്രവര്‍ത്തന – സാമ്പത്തിക റിപ്പോര്‍ട്ട് അവതരിപ്പിച്ചു. വിഎസ് അബ്ദുല്ല കുഞ്ഞ് ഫൈസി, വൈ എം അബ്ദുറഹ്‌മാന്‍ അഹ്സനി എന്നിവര്‍ വിവിധ സെഷനുകള്‍ക്ക് നേതൃത്വം നല്‍കി. മൂസല്‍ മദനി തലക്കി, സയ്യിദ് ജലാലുദ്ദീന്‍ തങ്ങള്‍, അബ്ദുല്‍ മജീദ് ഫൈസി, ഇബ്രാഹിം ദാരിമി ഗുണജെ, സയ്യിദ് പി എസ് ആറ്റക്കോയ തങ്ങള്‍ പഞ്ചിക്കല്‍, സയ്യിദ് ഇബ്രാഹിം ഹാദി തങ്ങള്‍ ചൂരി, കെ പി അബ്ദുറഹ്‌മാന്‍ സഖാഫി പഴയ കടപ്പുറം,എം പി അബ്ദുല്ല ഫൈസി നെക്രാജെ, പള്ളംകോട് അബ്ദുല്‍ ഖാദര്‍ മദനി തുടങ്ങിയവര്‍ സംസാരിച്ചു. കെ പി ഹുസൈന്‍ സഅദി കെ സി റോഡ് സ്വാഗതവും മൊയ്ദു സഅദി ചേരുര്‍ നന്ദിയും പറഞ്ഞു.
