സര്‍ക്കാര്‍ പ്രഖ്യാപിച്ചകാലാവധി പൂര്‍ത്തിയായി; കാസര്‍ഗോഡ് പരിഹരിക്കപ്പെട്ടത് 50% താഴെ പരാതികള്‍
നവകേരള സദസില്‍ ലഭിച്ച പരാതികള്‍ പരിഹരിക്കുന്നതില്‍ മെല്ലെപ്പോക്ക്. കാസര്‍ഗോഡ് ജില്ലയില്‍ സര്‍ക്കാര്‍ പ്രഖ്യാപിച്ച 45 ദിവസത്തെ കാലാവധി പൂര്‍ത്തിയായപ്പോള്‍ 50 ശതമാനത്തില്‍ താഴെ പരാതികള്‍ മാത്രമാണ് പരിഹരിക്കപ്പെട്ടത്.
നവകേരള സദസ് തുടങ്ങിയ ഘട്ടത്തില്‍ മുഖ്യമന്ത്രി നടത്തിയ പ്രഖ്യാപനമാണിത്. പരാതി പരിഹരിക്കാന്‍ പരമാവധി 45 ദിവസം. മുഴുവന്‍ പരാതികളും തീര്‍പ്പാക്കും. നവകേരള സദസിന്റെ പര്യടനം ആദ്യം പൂര്‍ത്തിയ കാസര്‍ഗോഡ് ജില്ലയിലെ പരാതി പരിഹാരത്തിന്റെ സ്ഥിതി പരിശോധിക്കാം. അഞ്ച് മണ്ഡലങ്ങളിലായി ആകെ ലഭിച്ചത് 14704 പരാതികള്‍. 45 ദിവസം കഴിഞ്ഞപ്പോള്‍ പരിഹാരമായത് 5917 പരാതികളില്‍.
അതായത്, തീര്‍പ്പാക്കിയത് 50 ശതമാനത്തില്‍ താഴെ മാത്രം. 4715 പരാതികള്‍ അന്തിമ ഘട്ടത്തിലാണെന്നും 4072 പരാതികള്‍ വിവിധ വകുപ്പുകളുടെ പരിഗണനയിലാണെന്നുമാണ് ജില്ലാ ഭരണകൂടത്തിന്റെ വിശദീകരണം. എന്തായാലും പൊതുജനങ്ങളുടെ പരാതി പരിഹരിക്കാന്‍ അതിവേഗ നടപടിയെന്ന സര്‍ക്കാര്‍ പ്രഖ്യാപനം നടപ്പിലായിട്ടില്ല. താരതമ്യേന കുറവ് പരാതികള്‍ ലഭിച്ച കാസര്‍ഗോട്ട് ഇതാണ് സ്ഥിതിയാണെങ്കില്‍ മറ്റിടങ്ങളില്‍ എന്ത് സംഭവിക്കുമെന്നത് കണ്ടുതന്നെ അറിയണം.
