ഇരുപത്തിയേഴാം രാവും മോചനത്തിന്റെ ആത്മീയ പാതയും

പരിശുദ്ധ റമദാൻ വിട പറയാനൊരുങ്ങിയിരിക്കുകയാണ്. വിശ്വാസികളുടെ ഹൃദയങ്ങളിൽ വിങ്ങലും പ്രതീക്ഷയും ഒരുപോലെ തിരതല്ലുന്ന നിമിഷങ്ങൾ. ഖുർആൻ അധ്യായം 97-ൽ (സൂറത്തുൽ ഖദർ) അല്ലാഹു വിശേഷിപ്പിച്ചത് പോലെ, 'ആയിരം മാസങ്ങളേക്കാൾ ഉത്തമമായ' ആ രാവ് നമ്മുടെ പടിവാതിൽക്കൽ എത്തിനിൽക്കുന്നു. ഒരു മനുഷ്യായുസ്സ് മുഴുവൻ ആരാധനാനിരതനായി ഇരുന്നാൽ ലഭിക്കുന്നതിനേക്കാൾ വലിയ പ്രതിഫലം ഏതാനും മണിക്കൂറുകൾ കൊണ്ട് വാരിക്കൂട്ടാനുള്ള സുവർണ്ണാവസരമാണിത്. ഈ രാവിനെ അവഗണിക്കുന്നവൻ സർവ്വ നന്മകളും തടയപ്പെട്ടവനാണെന്ന പ്രവാചക വചനം ഓരോ വിശ്വാസിയെയും ജാഗരൂകനാക്കേണ്ടതുണ്ട്.

ഇസ്‌ലാമിക ചരിത്രത്തിലെ ഏറ്റവും സവിശേഷമായ അധ്യായമാണ് ലൈലത്തുൽ ഖദർ. ലോകത്തിന്റെ ഇരുളകറ്റാൻ അല്ലാഹുവിന്റെ സന്ദേശമായ പരിശുദ്ധ ഖുർആൻ ലൗഹുൽ മഹ്ഫൂദിൽ നിന്നും ഒന്നാം ആകാശത്തേക്ക് ഇറക്കപ്പെട്ടത് ഈ രാത്രിയിലാണ്. മനുഷ്യരാശിയുടെ വിധി നിർണ്ണയിക്കപ്പെടുന്ന, മാലാഖമാർ ഭൂമിയിലേക്ക് അണിനിരക്കുന്ന ഈ സമയം വെറുമൊരു രാപ്പകൽ മാറ്റമല്ല. മറിച്ച്, ഭൂമിയിലെ ഓരോ ചലനവും ആകാശലോകം സസൂക്ഷ്മം നിരീക്ഷിക്കുന്ന, പ്രാർത്ഥനകൾക്ക് ഉടനടി ഉത്തരം ലഭിക്കുന്ന അത്യപൂർവ്വ മുഹൂർത്തമാണ്. പണ്ഡിതന്മാരുടെ നിരീക്ഷണപ്രകാരം 'ഖദർ' എന്ന പദത്തിന് 'വിധി' എന്നും 'ഇടുങ്ങിയത്' എന്നും അർത്ഥമുണ്ട്. മലക്കുകളുടെ ആധിക്യം കാരണം ഭൂമി ഇടുങ്ങിപ്പോകുന്ന അത്രയും വലിയ ആത്മീയ സാന്നിധ്യമാണ് ഈ രാത്രിയിൽ സംഭവിക്കുന്നത്.

ഇരുപത്തിയേഴാം രാവിനെക്കുറിച്ച് പ്രമുഖ സ്വഹാബിയായ ഉബയ്യുബ്നു കഅ്ബ് (റ) വിന്റെ വാക്കുകൾ ശ്രദ്ധേയമാണ്. റമദാനിലെ അവസാന പത്തിലെ ഒറ്റയിട്ട രാവുകളിൽ ലൈലത്തുൽ ഖദർ ഒളിഞ്ഞു കിടക്കുന്നുണ്ടെങ്കിലും ഇരുപത്തിയേഴാം രാവിനാണ് ഏറ്റവും കൂടുതൽ സാധ്യതയെന്ന് അദ്ദേഹം സത്യം ചെയ്ത് പറയുമായിരുന്നു. പ്രവാചകൻ (സ) നൽകിയ അടയാളങ്ങളും സ്വഹാബത്തിന്റെ അനുഭവങ്ങളും ഈ രാവിനോടുള്ള വിശ്വാസികളുടെ ആഭിമുഖ്യം വർദ്ധിപ്പിക്കുന്നു. എന്നാൽ ഇത് വെറുമൊരു ആഘോഷമല്ല, മറിച്ച് കണ്ണീരോടെ പടച്ചവന്റെ മുന്നിൽ പാപങ്ങൾ ഏറ്റുപറഞ്ഞ് വിശുദ്ധിയാകാനുള്ള അവസാന വട്ട ശ്രമമാണ്. കഴിഞ്ഞുപോയ രാത്രികളിൽ വീഴ്ച വരുത്തിയവർക്ക് തിരിച്ചുപിടിക്കാനുള്ള അവസാനത്തെ പിടിവള്ളിയാണിത്.

ആത്മീയതയുടെ പാരമ്യത്തിൽ നിൽക്കുന്ന ഈ നിമിഷങ്ങളിൽ നാം ചൊല്ലേണ്ട ഏറ്റവും വലിയ പ്രാർത്ഥന പ്രവാചകൻ (സ) ആയിഷാ ബീവിക്ക് (റ) പഠിപ്പിച്ചു കൊടുത്തതാണ്: "അല്ലാഹുമ്മ ഇന്നക്ക അഫുവ്വുൻ തുഹിബ്ബുൽ അഫ്‌വ ഫഅ്ഫു അന്നീ" (അല്ലാഹുവേ, നീ മാപ്പ് നൽകുന്നവനാണ്, മാപ്പ് നൽകാൻ ഇഷ്ടപ്പെടുന്നവനാണ്, അതിനാൽ എനിക്ക് നീ മാപ്പ് നൽകേണമേ). അധികാരമോ സമ്പത്തോ അല്ല, മറിച്ച് സ്രഷ്ടാവിന്റെ പൊരുത്തവും മാപ്പും മാത്രമാണ് യഥാർത്ഥ വിജയമെന്ന് ഈ പ്രാർത്ഥന നമ്മെ ഓർമ്മിപ്പിക്കുന്നു. സർവ്വാധിനാഥനായ അല്ലാഹു തന്റെ അടിമകളോട് ഏറ്റവും കൂടുതൽ അടുക്കുന്ന ഈ രാത്രിയിൽ ദുനിയാവിലെ നിസ്സാരമായ മോഹങ്ങൾക്ക് പകരം പരലോക വിജയത്തിന് വേണ്ടിയായിരിക്കണം നമ്മുടെ ഓരോ തേട്ടവും.

ഈ രാത്രിയുടെ നിശബ്ദതയിൽ ഒരു പ്രത്യേക പ്രശാന്തതയുണ്ട്. പള്ളികളിൽ ഇഅ്തികാഫ് ഇരിക്കുന്ന വിശ്വാസികൾക്കും, വീടുകളിൽ പ്രാർത്ഥനയിൽ മുഴുകുന്നവർക്കും ഈ അനുഭവം തിരിച്ചറിയാനാകും. മലക്കുകളുടെ നേതാവ് ജിബ്രീൽ (അ) ഉം പതിനായിരക്കണക്കിന് മലക്കുകളും ഭൂമിയിലേക്ക് ഇറങ്ങിവന്ന് സമാധാനത്തിന്റെ തണൽ വിരിക്കുകയാണ്. സുബഹി പ്രഭാതം വരെ നീളുന്ന ഈ സമാധാനം ലോകത്തെ എല്ലാ കഷ്ടതകളിൽ നിന്നും വിശ്വാസിയെ മോചിപ്പിക്കാൻ പ്രാപ്തമാണ്. ഓരോ ശ്വാസത്തിലും അല്ലാഹുവിന്റെ സ്മരണ നിലനിർത്തുന്നവർക്ക് മാത്രമേ ആത്മീയമായ ഈ അനുഭൂതി നുകരാൻ സാധിക്കൂ. അതുകൊണ്ട് തന്നെ അലസത വെടിഞ്ഞ് ജാഗ്രതയോടെ ഈ രാവിനെ നാം എതിരേൽക്കേണ്ടതുണ്ട്.

പലപ്പോഴും ഇരുപത്തിയേഴാം രാവ് കഴിഞ്ഞാൽ റമദാൻ അവസാനിച്ചു എന്നൊരു മനോഭാവം പലരിലും ഉണ്ടാകാറുണ്ട്. എന്നാൽ യഥാർത്ഥത്തിൽ ഇത് അവസാനത്തിന്റെ തുടക്കമാണ്. ഈ രാവിൽ നാം പടുത്തുയർത്തുന്ന ആത്മീയ കരുത്ത് വരും മാസങ്ങളിൽ നമ്മുടെ ജീവിതത്തെ നയിക്കേണ്ടതാണ്. സകാത്തും സ്വദഖയും നൽകി ദരിദ്രരുടെ കണ്ണീരൊപ്പാനും, ഖുർആൻ പാരായണത്തിലൂടെ ഹൃദയം കഴുകി വൃത്തിയാക്കാനും ഈ സമയം വിനിയോഗിക്കണം. പ്രവാചകൻ (സ) തന്റെ വസ്ത്രം മുറുക്കി ഉടുത്ത്, ഉറക്കമൊഴിഞ്ഞ് പ്രാർത്ഥനയിൽ സജീവമായിരുന്ന ആ അവസാന പത്തിലെ ദിനരാത്രങ്ങൾ നമുക്ക് വലിയ പാഠമാണ് നൽകുന്നത്. നമ്മുടെ പ്രാർത്ഥനകളിൽ മാതാപിതാക്കളെയും ലോകത്തെമ്പാടും കഷ്ടത അനുഭവിക്കുന്ന സഹോദരങ്ങളെയും ഉൾപ്പെടുത്താൻ മറക്കരുത്.

മഹാന്മാരായ പണ്ഡിതന്മാർ ഈ രാത്രിയെ വിശേഷിപ്പിച്ചത് 'ഭാഗ്യവാന്മാരുടെ വിളവെടുപ്പ്' എന്നാണ്. വർഷത്തിൽ ഒരിക്കൽ മാത്രം ലഭിക്കുന്ന ഈ ഓഫർ നഷ്ടപ്പെടുത്തുന്നവനെക്കാൾ വലിയ പരാജിതൻ വേറെയാരുണ്ട്. ഹൃദയത്തിന്റെ ഉള്ളറകളിൽ ഒളിപ്പിച്ചു വെച്ച രഹസ്യ പാപങ്ങൾ ഓർത്ത് പശ്ചാത്തപിക്കാനും അല്ലാഹുവിന്റെ റഹ്മത്തിൽ പ്രത്യാശ അർപ്പിക്കാനും ഈ രാവിനോളം അനുയോജ്യമായ മറ്റൊരു സമയമില്ല.

ഈ രാവിന്റെ മറ്റൊരു വലിയ സന്ദേശം 'സലാം' അഥവാ സമാധാനമാണ്. 'സലാമുൻ ഹിയ ഹത്താ മത്‌ലഇൽ ഫജ്ർ' (പ്രഭാതം വരെ അത് സമാധാനമാണ്) എന്ന് ഖുർആൻ പറയുമ്പോൾ, വ്യക്തികൾ തമ്മിലുള്ള പിണക്കങ്ങൾ തീർക്കാനും ഹൃദയങ്ങൾ തമ്മിൽ ഐക്യപ്പെടാനുമുള്ള സന്ദേശം കൂടി അതിലുണ്ട്. വിദ്വേഷം വെച്ചുപുലർത്തുന്നവന്റെ പ്രാർത്ഥനകൾ അല്ലാഹു സ്വീകരിക്കുകയില്ല. അതിനാൽ, ഈ ഇരുപത്തിയേഴാം രാവിലേക്ക് പ്രവേശിക്കുമ്പോൾ സഹോദരങ്ങളോടുള്ള എല്ലാ പരിഭവങ്ങളും മറന്ന് ശുദ്ധമായ ഹൃദയത്തോടെ അല്ലാഹുവിനെ അഭിമുഖീകരിക്കാൻ നാം തയ്യാറാകണം. ആത്മീയ വിശുദ്ധിയും മാനുഷിക നന്മയും ഒത്തുചേരുമ്പോഴാണ് ഒരു വിശ്വാസി യഥാർത്ഥത്തിൽ ലൈലത്തുൽ ഖദറിന് അർഹനാകുന്നത്.

ഈ രാവ് വിടവാങ്ങുമ്പോൾ നമ്മുടെ കൈകളിൽ അല്ലാഹുവിന്റെ പാപമോചനത്തിന്റെ രേഖ ഉണ്ടായിരിക്കണം. അവസാനത്തെ പത്തിലെ ഈ പരിശ്രമം നമ്മെ പുതിയൊരു മനുഷ്യനാക്കി മാറ്റട്ടെ. വരാനിരിക്കുന്ന പെരുന്നാളിന് പുതിയ വസ്ത്രങ്ങളേക്കാൾ പ്രധാനം ഈ രാവിൽ നാം നേടിയെടുത്ത പുതിയൊരു മനസ്സാകട്ടെ. അല്ലാഹു അനുഗ്രഹിച്ചാൽ, നാളെ രാത്രി നമുക്ക് ലഭിക്കാൻ പോകുന്നത് നൂറ്റാണ്ടുകളുടെ പ്രതിഫലമാണ്. ആ മഹാഭാഗ്യത്തിൽ പങ്കുചേരാൻ സർവ്വശക്തൻ നമുക്ക് തൗഫീഖ് നൽകട്ടെ. ഇരുപത്തിയേഴാം രാവ് നമ്മുടെ ജീവിതത്തിലെ ടേണിംഗ് പോയിന്റ് ആകട്ടെ എന്ന് പ്രാർത്ഥിക്കുന്നു.

✍️സയ്യിദ് സിനാൻ പരുത്തിക്കോട്