മനുഷ്യരെ ചേർത്ത് പിടിക്കുന്ന പ്രതീക്ഷയുടെ യാത്ര

സാമൂഹിക ജീവിതത്തിൽ പലപ്പോഴും നിരാശയും അവഗണനയും മാത്രം നിറഞ്ഞു നിൽക്കുന്ന കാലഘട്ടത്തിലാണ് കേരള മുസ്‌ലിം ജമാഅത്ത് നയിക്കുന്ന ‘കേരള യാത്ര’ ശ്രദ്ധേയമാകുന്നത്. അധികാരമോ പ്രദർശനമോ ലക്ഷ്യമാക്കാതെ മനുഷ്യരെ ചേർത്ത് പിടിക്കാനും അവരുടെ വേദനകൾക്ക് ആശ്വാസം നൽകാനും ശ്രമിക്കുന്ന ഈ യാത്ര സമൂഹത്തിന് വലിയ പ്രതീക്ഷയാണ് നൽകുന്നത്.
കേരളം പലവിധ വെല്ലുവിളികൾ നേരിടുന്ന ഘട്ടത്തിലൂടെയാണ് കടന്നു പോയിക്കൊണ്ടിരിക്കുന്നത്. സാമ്പത്തിക ബുദ്ധിമുട്ടുകൾ, കുടുംബബന്ധങ്ങളിലെ പാളിച്ചകൾ, യുവതലമുറ നേരിടുന്ന ആശയക്കുഴപ്പങ്ങൾ, സാമൂഹിക അകലം എന്നിവ എല്ലാം ചേർന്ന് മനുഷ്യരെ കൂടുതൽ ഒറ്റപ്പെടുത്തുന്ന സാഹചര്യം സൃഷ്ടിക്കുന്നു. ഇത്തരം ഘട്ടങ്ങളിൽ രാഷ്ട്രീയവും സാമൂഹികവുമായ ഇടപെടലുകൾ പലപ്പോഴും വിഭാഗീയതയിലേക്ക് വഴുതിപ്പോകുന്നുവെന്ന വിമർശനവും നിലനിൽക്കുന്നു. ഈ പശ്ചാത്തലത്തിലാണ് കേരള മുസ്‌ലിം ജമാഅത്തിന്റെ ‘കേരള യാത്ര’ വേറിട്ടൊരു സമീപനമായി മാറുന്നത്.
ഈ യാത്രയുടെ ഏറ്റവും വലിയ പ്രത്യേകത മനുഷ്യരെ മനുഷ്യരായി കാണുന്ന കാഴ്ചപ്പാടാണ്. മതം, ജാതി, രാഷ്ട്രീയം എന്നിവയ്ക്കപ്പുറം ഓരോ മനുഷ്യന്റെയും വേദന കേൾക്കാനും അവരെ ചേർത്ത് പിടിക്കാനുമുള്ള ശ്രമം പലർക്കും ആത്മവിശ്വാസം പകരുന്നു. ‘കേരള യാത്ര’ ഒരു പരിപാടിയോ സമ്മേളനമോ മാത്രമല്ല; അത് ഒരു സാമൂഹിക സന്ദേശമാണ്. പരസ്പര സ്‌നേഹവും സഹവർത്തിത്വവുമാണ് സമൂഹത്തിന്റെ ശക്തിയെന്ന തിരിച്ചറിവാണ് ഇതിലൂടെ മുന്നോട്ടുവെക്കുന്നത്.

കേരള മുസ്‌ലിം ജമാഅത്ത് എന്നും ആത്മീയതയും സാമൂഹിക ഉത്തരവാദിത്വവും ഒരുപോലെ കൈകോർക്കുന്ന പ്രസ്ഥാനമായി അറിയപ്പെടുന്നു. ആ പാരമ്പര്യത്തിന്റെ തുടർച്ചയാണ് ഈ യാത്രയും. പ്രസംഗങ്ങളിലോ വേദികളിലോ ഒതുങ്ങാതെ, സാധാരണക്കാരുടെ ഇടയിലേക്കിറങ്ങി അവരുടെ ജീവിത യാഥാർഥ്യങ്ങൾ മനസ്സിലാക്കാനുള്ള ശ്രമമാണ് ഈ യാത്രയുടെ ലക്ഷ്യം. വീടുകളിലും സ്ഥാപനങ്ങളിലുമായി നടക്കുന്ന കൂടിക്കാഴ്ചകളിലൂടെ മനുഷ്യബന്ധങ്ങൾ പുതുക്കപ്പെടുന്നു. പ്രത്യേകിച്ച്, യുവതലമുറക്ക് ഈ യാത്ര നൽകുന്ന സന്ദേശം വളരെ പ്രധാനമാണ്. ആശയകുഴപ്പവും വഴിതെറ്റലും അനുഭവിക്കുന്ന പല യുവാക്കളും ഇന്ന് സമൂഹത്തിലുണ്ട്. അവർക്കിടയിലേക്ക് ആശ്വാസത്തിന്റെ വാക്കുകളായും ദിശാബോധം നൽകുന്ന സന്ദേശങ്ങളായും ‘കേരള യാത്ര’ വലിയ സ്വാധീനം ചെലുത്തുന്നുണ്ട്. ജീവിതം വെറും മത്സരമോ, വിജയ പരാജയങ്ങളുടെ കണക്കോ മാത്രമല്ല. മറിച്ച് പരസ്പര കരുതലും ഉത്തരവാദിത്വവുമാണ് അതിന്റെ സാരമെന്ന ബോധം ഇതിലൂടെ ശക്തമാകുന്നു.

സ്ത്രീകളും കുടുംബങ്ങളും ഈ യാത്രയോട് വലിയ പ്രതീക്ഷയോടെയാണ് പ്രതികരിക്കുന്നത്. കുടുംബബന്ധങ്ങൾ തകരുന്ന കാലത്ത്, സ്‌നേഹവും ക്ഷമയും സംവാദവും ജീവിതത്തിന്റെ അടിസ്ഥാന മൂല്യങ്ങളാണെന്ന് ഓർമ്മിപ്പിക്കുന്ന സന്ദേശങ്ങൾ ഏറെ പ്രസക്തമാണ്. സമൂഹം മുന്നേറേണ്ടത് വാക്കുകളുടെ കൊടുമുടികളിലൂടെയല്ല, മറിച്ച് മനുഷ്യഹൃദയങ്ങളെ ചേർത്ത് പിടിച്ചുകൊണ്ടാണെന്ന സന്ദേശം ‘കേരള യാത്ര’ ശക്തമായി ഉയർത്തിപ്പിടിക്കുന്നു. സാമൂഹിക സേവനത്തിന്റെ കാര്യത്തിലും ഈ യാത്ര ശ്രദ്ധേയമാണ്.
 
ദാരിദ്ര്യം, രോഗം, ഒറ്റപ്പെടൽ എന്നിവ അനുഭവിക്കുന്നവരിലേക്ക് കൈത്താങ്ങായി എത്താനുള്ള ശ്രമങ്ങൾ പല പ്രദേശങ്ങളിലും കാണാനാകുന്നു. വേദനകളെ വെറും കണക്കുകളായി കാണാതെ, അനുഭവങ്ങളായി മനസ്സിലാക്കുന്ന സമീപനമാണ് ഇവിടെയുള്ളത്. അതുകൊണ്ടുതന്നെ, ഈ യാത്ര പലർക്കും ആശ്വാസത്തിന്റെ നിമിഷങ്ങളായി മാറുന്നു. മാധ്യമ ശ്രദ്ധയോ വലിയ പ്രചാരണമോ ലക്ഷ്യമാക്കി നടത്തുന്ന പ്രവർത്തനങ്ങളല്ല. മറിച്ച്, നിശബ്ദമായി മനുഷ്യഹൃദയങ്ങളിൽ ഇടം പിടിക്കുന്ന ഒരു യാത്രയാണിത്.

ഇന്നത്തെ കാലത്ത് അത്തരം ഇടപെടലുകൾ വളരെ അപൂർവമാണെന്നത് തന്നെ ‘കേരള യാത്ര’യുടെ പ്രസക്തി വർധിപ്പിക്കുന്നു. സമൂഹം വിഭജിക്കപ്പെടുന്ന സന്ദർഭങ്ങളിൽ ഐക്യത്തിന്റെ ശബ്ദമായി മാറാൻ കഴിയുന്ന പ്രസ്ഥാനങ്ങളാണ് യഥാർത്ഥ ശക്തി. കേരള മുസ്‌ലിം ജമാഅത്ത് നയിക്കുന്ന ‘കേരള യാത്ര’ അത്തരമൊരു ശബ്ദമായി മാറുകയാണ്. മനുഷ്യരെ ചേർത്ത് പിടിക്കുകയും വേദനകളെ ആശ്വാസമാക്കി മാറ്റുകയും ചെയ്യുന്ന ഈ യാത്ര കേരളത്തിന്റെ സാമൂഹിക ജീവിതത്തിൽ ദീർഘകാല സ്വാധീനം ചെലുത്തുമെന്നതിൽ സംശയമില്ല. പരസ്പരം ചേർന്ന് നിൽക്കുമ്പോൾ മാത്രമേ സമൂഹത്തിന് മുന്നോട്ട് പോകാൻ കഴിയൂ എന്ന സത്യത്തെ ഓർമ്മിപ്പിക്കുന്ന കേരള മുസ്‌ലിം ജമാഅത്ത് നയിക്കുന്ന 'മനുഷ്യർക്കൊപ്പം' എന്ന സന്ദേശത്തിലുള്ള ഈ കേരളയാത്ര സമകാലിക കേരളത്തിന് പ്രതീക്ഷയുടെ വെളിച്ചമാണ്.

✍️ എ.പി അബ്ദുള്ള ആരിഫ് ഹാശിമി കളത്തൂർ
7592956315