കേരള മുസ്‌ലിം നവോത്ഥാനവും സമസ്തയുടെ ചരിത്ര ദൗത്യവും

കേരളത്തിന്റെ സാമൂഹിക-സാംസ്കാരിക ചരിത്രത്തിൽ നവോത്ഥാനം എന്ന വാക്ക് പലപ്പോഴും പരമ്പരാഗത മൂല്യങ്ങളെ തള്ളിക്കളയുന്ന ആധുനികത വാദങ്ങളോട് ചേർത്താണ് വായിക്കപ്പെടാറുള്ളത്. എന്നാൽ, ഒരു ജനതയുടെ ആത്മീയ സത്തയെയും നൂറ്റാണ്ടുകളായി അവർ കൈമാറിപ്പോന്ന തനതായ സംസ്കാരത്തെയും നെഞ്ചേറ്റിക്കൊണ്ട്, അവരെ വിദ്യാഭ്യാസപരമായും ഭൗതികമായും ഉയർത്തിക്കൊണ്ടുവരുന്ന പ്രക്രിയയാണ് യഥാർത്ഥ നവോത്ഥാനം. ഈയൊരു സവിശേഷമായ കാഴ്ച്ചപ്പാടിലൂടെ കേരളത്തിലെ മുസ്ലിം സമുദായത്തിന് കൃത്യമായ ദിശാബോധം നൽകിയ പ്രസ്ഥാനമാണ് സമസ്ത കേരള ജംഇയ്യത്തുൽ ഉലമ. വൈദേശിക അധിനിവേശങ്ങൾക്കെതിരെയും ആഭ്യന്തരമായി ഉയർന്നുവന്ന പുതിയ ആശയധാരകൾക്കെതിരെയും പരമ്പരാഗത ഇസ്‌ലാമിക വിശ്വാസങ്ങളെയും സൂഫി മാർഗ്ഗങ്ങളെയും സംരക്ഷിക്കാൻ വേണ്ടി രൂപീകരിക്കപ്പെട്ട ഈ പ്രസ്ഥാനം, കഴിഞ്ഞ ഒരു നൂറ്റാണ്ടുകാലമായി കേരളത്തിന്റെ ആത്മീയ ഭൂമികയെ ഭദ്രമായി കാത്തുസൂക്ഷിക്കുന്നു.

​ഇരുപതാം നൂറ്റാണ്ടിന്റെ തുടക്കത്തിൽ 1926ൽ വന്ദ്യരായ വരക്കൽ മുല്ലക്കോയ തങ്ങളുടെ നേതൃത്വത്തിലാണ് സമസ്ത ഔദ്യോഗികമായി ജന്മമെടുക്കുന്നത്. പാങ്ങിൽ അഹ്മദ് കുട്ടി മുസ്ലിയാർ ഉൾപ്പെടെയുള്ള പ്രമുഖ പണ്ഡിതന്മാർ അണിനിരന്ന ആ സദസ്സ് വിഭാവനം ചെയ്തത് പൂർവ്വികരായ മഹത്തുക്കൾ കാണിച്ചുതന്ന അഹ്‌ലുസ്സുന്നത്തി വൽ ജമാഅത്തിന്റെ ശുദ്ധമായ ആദർശ വഴിയിലൂടെ ജനങ്ങളെ നയിക്കുക എന്നതായിരുന്നു. പള്ളികളിലെ ഓത്തുപള്ളികളിൽ ഒതുങ്ങി നിന്നിരുന്ന മതപഠനത്തെ വ്യവസ്ഥാപിതമായ ക്ലാസ്സ് റൂം പഠനരീതിയിലേക്ക് മാറ്റിയ 1951-ലെ മദ്‌റസാ പ്രസ്ഥാനത്തിന്റെ രൂപീകരണം വഴി സമുദായത്തിൽ വലിയൊരു വിദ്യാഭ്യാസ വിപ്ലവത്തിന് സമസ്ത തുടക്കമിട്ടു. ഭൗതിക വിദ്യാഭ്യാസത്തെ പാടെ നിരാകരിക്കാതെ, എന്നാൽ മതപരമായ അച്ചടക്കത്തിന് മുൻഗണന നൽകിക്കൊണ്ടുള്ള ഈ മാതൃകയാണ് കേരള മുസ്ലിംകളെ ഇന്ത്യയിലെ മറ്റ് സംസ്ഥാനങ്ങളിലെ മുസ്ലിംകളിൽ നിന്നും വേറിട്ടുനിർത്തിയത്. ചരിത്രത്തിന്റെ അടുത്ത ഘട്ടങ്ങളിലേക്ക് പ്രസ്ഥാനം സഞ്ചരിക്കുമ്പോൾ, ചില ആഭ്യന്തരമായ പ്രതിസന്ധികളും വീക്ഷണവ്യത്യാസങ്ങളും സംഘടനയ്ക്കകത്ത് രൂപപ്പെടുകയുണ്ടായി. പാരമ്പര്യ പണ്ഡിതസഭയുടെ ആദ്യകാല ലക്ഷ്യങ്ങളിൽ നിന്നും അതിന്റെ രാഷ്ട്രീയേതരമായ സ്വഭാവത്തിൽ നിന്നും സംഘടന വ്യതിചലിക്കുന്നു എന്ന ശക്തമായ വിയോജിപ്പ് ഒരുകൂട്ടം പണ്ഡിതന്മാർക്കിടയിൽ ഉടലെടുത്തു. ഈയൊരു പശ്ചാത്തലത്തിലാണ് വരക്കൽ മുല്ലക്കോയ തങ്ങൾ വിഭാവനം ചെയ്ത സമസ്തയുടെ യഥാർത്ഥ ആത്മീയ പാരമ്പര്യവും കർക്കശമായ ആദർശ നിലപാടുകളും തനിമ ചോരാതെ മുന്നോട്ട് കൊണ്ടുപോകേണ്ടതുണ്ട് എന്ന ബോധ്യത്തോടെ ഒരു വിഭാഗം പണ്ഡിതന്മാർ താജുൽ ഉലമ സയ്യിദ് അബ്ദുറഹ്മാൻ ബുഖാരി, ശൈഖുനാ കാന്തപുരം എ.പി. അബൂബക്കർ മുസ്ലിയാർ ഉൾപ്പെടെയുള്ള നേതൃത്വത്തിന് കീഴിൽ നിലയുറപ്പിക്കുന്നത്. ചരിത്രപരമായ ഈ വഴിത്തിരിവ്, കേവലം ഒരു സംഘടനാ തർക്കത്തിനപ്പുറം സമസ്തയുടെ യഥാർത്ഥ അവകാശത്തെയും ആദർശ സംരക്ഷണത്തെയും കുറിച്ചുള്ള ആഴത്തിലുള്ള ബോധ്യത്തിൽ അധിഷ്ഠിതമായിരുന്നു.

ആരെയെങ്കിലും വ്യക്തിപരമായി അധിക്ഷേപിക്കാനോ മാറ്റിനിർത്താനോ ഉള്ള ശ്രമങ്ങൾക്കപ്പുറം പൂർവ്വികരുടെ തനത് വഴിയിൽ ഉറച്ചുനിൽക്കുക എന്നതായിരുന്നു ഈ മുന്നേറ്റത്തിന്റെ കാതൽ. ഈ ആത്മീയ തുടർച്ചയുടെ പ്രായോഗിക രൂപമായാണ് പിന്നീട് സുൽത്വാനുൽ ഉലമ കാന്തപുരം എ.പി. അബൂബക്കർ മുസ്ലിയാരുടെ നേതൃത്വത്തിൽ കേരളം കണ്ട ഏറ്റവും വലിയ നവോത്ഥാന പ്രവർത്തനങ്ങൾ വളർന്നുവരുന്നത്.

വരക്കൽ മുല്ലക്കോയ തങ്ങൾ തുടങ്ങിവെച്ച ആദർശ പ്രസ്ഥാനത്തിന്റെ സാക്ഷാത്കാരമെന്നോണം കാരന്തൂർ മർക്കസുസ്സഖാഫത്തിസ്സുന്നിയ്യ എന്ന സ്ഥാപനം ജന്മമെടുത്തു. അനാഥരും പാവപ്പെട്ടവരുമായ പതിനായിരങ്ങൾക്ക് അഭയമേകിയ മർക്കസ്, മതവിദ്യാഭ്യാസവും ഭൗതികവിദ്യാഭ്യാസവും സമന്വയിപ്പിച്ചുകൊണ്ടുള്ള പുതിയൊരു വിപ്ലവത്തിന് തിരികൊളുത്തി. സമസ്തയുടെ ഈ പാരമ്പര്യ ധാര കേരളത്തിന്റെ അതിരുകൾ ഭേദിച്ച് കശ്മീർ മുതൽ കന്യാകുമാരി വരെയുള്ള ഉത്തരേന്ത്യൻ സംസ്ഥാനങ്ങളിലെ പിന്നാക്ക ഗ്രാമങ്ങളിലേക്ക് വ്യാപിപ്പിക്കാൻ കാന്തപുരം ഉസ്താദിന് സാധിച്ചു. അവിടെയെല്ലാം വിദ്യാലയങ്ങളും കുടിവെള്ള പദ്ധതികളും സ്ഥാപിച്ച് അവിടുത്തെ ജനതയെയും മുഖ്യധാരയിലേക്ക് കൊണ്ടുവരുന്നതിൽ ഈ പ്രസ്ഥാനം വിജയം കണ്ടു.

​ആധുനിക കാലഘട്ടത്തിന്റെ ആവശ്യങ്ങളെ കൃത്യമായി ഉൾക്കൊണ്ടുകൊണ്ട് മർക്കസ് നോളജ് സിറ്റി പോലുള്ള ലോകോത്തര നിലവാരത്തിലുള്ള സംരംഭങ്ങൾ പടുത്തുയർത്തിയപ്പോഴും തങ്ങളുടെ അടിസ്ഥാനപരമായ ആത്മീയ മൂല്യങ്ങളിലും സൂഫി പാരമ്പര്യത്തിലും യാതൊരു വിട്ടുവീഴ്ചയും വരുത്തിയില്ല എന്നതാണ് ഈ പ്രസ്ഥാനത്തിന്റെ ഏറ്റവും വലിയ സവിശേഷത. ആത്മീയതയും ആധുനികതയും എങ്ങനെ ഒന്നിച്ച് കൊണ്ടുപോകാമെന്ന് ഈ പ്രസ്ഥാനം ജനങ്ങൾക്ക് കാണിച്ചുകൊടുത്തു.

1926-ൽ വരക്കൽ മുല്ലക്കോയ തങ്ങൾ വിതച്ച ആദർശത്തിന്റെ വിത്തുകൾ കാലത്തിന്റെ മാറ്റങ്ങൾക്കൊപ്പവും പാരമ്പര്യത്തിന്റെ തനിമ ഒട്ടും നഷ്ടപ്പെടുത്താതെയും കാത്തുസൂക്ഷിക്കാൻ സമസ്തക്ക് സാധിച്ചിട്ടുണ്ട്. കേരളത്തിലെ മുസ്ലിം സമുദായത്തിന്റെ ഭൂതകാലത്തെയും വർത്തമാനകാലത്തെയും തമ്മിൽ ബന്ധിപ്പിക്കുന്ന സുശക്തമായ ഒരു കണ്ണിയായി, ജ്ഞാന പ്രസരണത്തിന്റെ പ്രകാശഗോപുരമായി ഈ ചരിത്രതുടർച്ച ഇന്നും സജീവമായി നിലകൊള്ളുന്നു.

✍️സുഹൈൽ കനിയാല