ഉമ്മന്‍ ചാണ്ടി: കേരള രാഷ്ട്രീയത്തിലെ സൗമ്യമുഖം

കേരള രാഷ്ട്രീയത്തില്‍ നിറഞ്ഞുനിന്ന ഉമ്മന്‍ ചാണ്ടി, ലാളിത്യം, ജനകീയത, സൗമ്യമായ പെരുമാറ്റം എന്നിവയാല്‍ ശ്രദ്ധേയനായ നേതാവായിരുന്നു.കേരള മുഖ്യമന്ത്രിയായും പ്രതിപക്ഷ നേതാവായും വിവിധ വകുപ്പുകളുടെ മന്ത്രിയായും പ്രവര്‍ത്തിച്ച അദ്ദേഹം, അഞ്ച് പതിറ്റാണ്ടിലേറെ നീണ്ട പൊതുപ്രവര്‍ത്തനത്തിലൂടെ കേരളത്തിന്റെ വികസനത്തിലും സാമൂഹിക മാറ്റങ്ങളിലും നിര്‍ണായക പങ്കുവഹിച്ചു.

1943 ഒക്ടോബര്‍ 31-ന് പുതുപ്പള്ളിയില്‍ ജനിച്ച ഉമ്മന്‍ ചാണ്ടി കോട്ടയം പുതുപ്പള്ളി സെന്റ് ജോര്‍ജ്ജ് ഹൈസ്‌കൂള്‍, സി.എം.എസ് കോളേജ്, ചങ്ങനാശ്ശേരി എസ്.ബി. കോളേജ്, എറണാകുളം ലോ കോളേജ് എന്നിവിടങ്ങളില്‍ നിന്ന് വിദ്യാഭ്യാസം പൂര്‍ത്തിയാക്കി. വിദ്യാര്‍ത്ഥി രാഷ്ട്രീയത്തിലൂടെയാണ് അദ്ദേഹം പൊതുരംഗത്തേക്ക് കടന്നുവരുന്നത്. കേരള സ്റ്റുഡന്റ്സ് യൂണിയന്റെ (KSU) സജീവ പ്രവര്‍ത്തകനായിരുന്നു. 1967-69 കാലഘട്ടത്തില്‍ കെ.എസ്.യുവിന്റെ സംസ്ഥാന പ്രസിഡന്റായി. പിന്നീട് യൂത്ത് കോണ്‍ഗ്രസ് സംസ്ഥാന പ്രസിഡന്റായും പ്രവര്‍ത്തിച്ചു. 1970-ല്‍ പുതുപ്പള്ളി മണ്ഡലത്തില്‍ നിന്ന് കേരള നിയമസഭയിലേക്ക് തിരഞ്ഞെടുക്കപ്പെട്ട ഉമ്മന്‍ ചാണ്ടി പിന്നീട് നടന്ന എല്ലാ തിരഞ്ഞെടുപ്പുകളിലും അതേ മണ്ഡലത്തില്‍ നിന്ന് വിജയിച്ചു. ഇത് അദ്ദേഹത്തിന്റെ ജനകീയ അടിത്തറയുടെയും പുതുപ്പള്ളിയിലെ ജനങ്ങളുമായുള്ള ആഴത്തിലുള്ള ബന്ധത്തിന്റെയും തെളിവായിരുന്നു. 1977-ല്‍ കെ. കരുണാകരന്‍ മന്ത്രിസഭയില്‍ തൊഴില്‍ മന്ത്രിയായാണ് ആദ്യമായി മന്ത്രിസഭയിലെത്തുന്നത്. പിന്നീട് ആഭ്യന്തരം, ധനം തുടങ്ങി പ്രധാന വകുപ്പുകളും അദ്ദേഹം കൈകാര്യം ചെയ്തിരുന്നു.

2004-2006, 2011-2016 എന്നീ കാലയളവുകളില്‍ രണ്ടു തവണയാണ് ഉമ്മന്‍ ചാണ്ടി കേരള മുഖ്യമന്ത്രിയായത്. അദ്ദേഹത്തിന്റെ ഭരണകാലത്ത് ഒട്ടേറെ ജനക്ഷേമകരമായ പദ്ധതികള്‍ക്ക് രൂപം നല്‍കുകയുണ്ടായി. ജനസമ്പര്‍ക്ക പരിപാടി ഉമ്മന്‍ ചാണ്ടി ഭരണത്തിലെ ഒരു പ്രധാന സവിശേഷതയായിരുന്നു. സാധാരണക്കാരുടെ പ്രശ്നങ്ങള്‍ നേരിട്ട് കേള്‍ക്കാനും അതിന് പരിഹാരം കാണാനും ഈ പരിപാടി സഹായിച്ചു. വിഴിഞ്ഞം തുറമുഖം, കണ്ണൂര്‍ വിമാനത്താവളം തുടങ്ങിയ വലിയ അടിസ്ഥാന സൗകര്യ വികസന പദ്ധതികള്‍ക്ക് തുടക്കം കുറിച്ചതും അദ്ദേഹത്തിന്റെ ഭരണകാലത്താണ്.കേരള രാഷ്ട്രീയത്തില്‍ പ്രതിസന്ധി ഘട്ടങ്ങളില്‍ സമവായത്തിലൂടെ പ്രശ്നങ്ങള്‍ക്ക് പരിഹാരം കണ്ടെത്താന്‍ ഉമ്മന്‍ ചാണ്ടിക്ക് പലപ്പോഴും സാധിച്ചു. അദ്ദേഹത്തിന്റെ സൗമ്യമായ സമീപനം പലപ്പോഴും രാഷ്ട്രീയ എതിരാളികളെ പോലും ആകര്‍ഷിച്ചു. ഐക്യരാഷ്ട്രസഭയുടെ പൊതുസേവന പുരസ്‌കാരവും അദ്ദേഹത്തിന് ലഭിച്ചിട്ടുണ്ട്.

ദീര്‍ഘകാലമായി രോഗബാധിതനായിരുന്ന ഉമ്മന്‍ ചാണ്ടി 2023 ജൂലൈ 18-ന് 79-ആം വയസ്സില്‍ ബംഗളൂരുവില്‍ വെച്ച് അന്തരിച്ചു. അദ്ദേഹത്തിന്റെ മരണം കേരള രാഷ്ട്രീയത്തിന് വലിയ നഷ്ടമായിരുന്നു. പുതുപ്പള്ളിയിലെ അദ്ദേഹത്തിന്റെ ഭൗതികശരീരം വഹിച്ചുകൊണ്ടുള്ള വിലാപയാത്ര ജനസാഗരമായി മാറുകയും അദ്ദേഹത്തിന്റെ ജനകീയത വിളിച്ചോതുന്നതായി മാറുകയും ചെയ്തു. പതിനായിരങ്ങളാണ് അദ്ദേഹത്തിന് അന്തിമോപചാരം അര്‍പ്പിക്കാന്‍ എത്തിയത്. അദ്ദേഹത്തിന്റെ വിയോഗം കേരള രാഷ്ട്രീയത്തിന് തീരാനഷ്ടമാണെങ്കിലും, അദ്ദേഹം തുടങ്ങിവച്ച ജനക്ഷേമ പ്രവര്‍ത്തനങ്ങളും അദ്ദേഹം ഉയര്‍ത്തിപ്പിടിച്ച മാനുഷിക മൂല്യങ്ങളും എന്നും ഓര്‍മ്മിക്കപ്പെടും.

✍ ഖലീല്‍ കനിയാല