സൗഹൃദം പുതുക്കാൻ മുംബൈ-കാസർകോട് കൂട്ടായ്മ; രണ്ടാമത് മെഗാ ഫാമിലി ഗെറ്റ് ടുഗദർ നവംബർ 29ന്
കാസർകോട്: മുംബൈയിലും പരിസരപ്രദേശങ്ങളിലുമുള്ള കാസർകോട്, മഞ്ചേശ്വരം, ഉദുമ മണ്ഡലങ്ങളിലെ പ്രവാസികളെ ഒന്നിപ്പിക്കുന്ന 'മുംബൈ-കാസർകോട് കൂട്ടായ്മ'യുടെ രണ്ടാമത് മെഗാ ഫാമിലി ഗെറ്റ് ടുഗദർ നവംബർ 29-ന് നടക്കും. മുംബൈയിലെ അഞ്ജുമൻ-ഇ-ഇസ്ലാം സ്കൂൾ ഗ്രൗണ്ടാണ് പ്രവാസി കുടുംബങ്ങളുടെ ഈ മഹാസംഗമത്തിന് വേദിയാകുന്നത്.
പ്രവാസികൾക്കിടയിൽ സൗഹൃദവും പരസ്പര സഹകരണവും ശക്തിപ്പെടുത്തുക എന്ന ലക്ഷ്യത്തോടെ 2024 ഒക്ടോബർ 14-ന് ഒരു വാട്സ്ആപ്പ് കൂട്ടായ്മയായാണ് സംഘടനയ്ക്ക് തുടക്കമായത്. ചുരുങ്ങിയ കാലയളവിനുള്ളിൽ തന്നെ മികച്ച സംഘാടനത്തിലൂടെ കൂട്ടായ്മ ശ്രദ്ധേയമായി. 2025 ജനുവരി 12-ന് നെരുളിൽ സംഘടിപ്പിച്ച പ്രഥമ സംഗമത്തിന്റെ വൻ വിജയമാണ് കൂടുതൽ വിപുലമായ പരിപാടികളോടെ രണ്ടാം സീസൺ ഒരുക്കാൻ സംഘാടകർക്ക് പ്രേരണയായത്.
കുടുംബസംഗമത്തിന് പുറമെ സാമൂഹിക സേവന-ജീവകാരുണ്യ മേഖലകളിലും കൂട്ടായ്മ സജീവമാണ്. നിർധനരായ രോഗികൾക്കുള്ള ചികിത്സാ സഹായം ഉൾപ്പെടെയുള്ള നിരവധി ക്ഷേമപ്രവർത്തനങ്ങൾ സംഘടനയുടെ നേതൃത്വത്തിൽ നടപ്പിലാക്കി വരുന്നുണ്ട്.
സംഗമത്തിന്റെ ഭാഗമായി വിവിധ കലാ-സാംസ്കാരിക പരിപാടികൾ, പൊതുസമ്മേളനം, വിവിധ മേഖലകളിൽ മികവ് തെളിയിച്ച പ്രമുഖ വ്യക്തിത്വങ്ങളെ ആദരിക്കൽ എന്നിവ അരങ്ങേറും. മുംബൈയിലും സമീപ പ്രദേശങ്ങളിലുമുള്ള മൂന്ന് മണ്ഡലങ്ങളിലെയും പ്രവാസികൾക്ക് പരസ്പരം പരിചയപ്പെടാനും സൗഹൃദങ്ങൾ പുതുക്കാനും നാടിന്റെ ഓർമ്മകൾ പങ്കുവെക്കാനുമുള്ള മികച്ച അവസരമായിരിക്കും ഈ സംഗമം.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0