'മയിൽപ്പീലി' സ്കോളർഷിപ്പ് വിവാദം അവസാനിപ്പിക്കാൻ വിദ്യാഭ്യാസ വകുപ്പ്; തുടർനടപടികൾ ഒഴിവാക്കിയേക്കും
തിരുവനന്തപുരം: സംഘ്പരിവാർ അനുകൂല അധ്യാപക സംഘടനയ്ക്ക് സംസ്ഥാനത്തെ പൊതുവിദ്യാലയങ്ങളിൽ സ്കോളർഷിപ്പ് പരീക്ഷ നടത്താൻ അനുമതി നൽകിയതുമായി ബന്ധപ്പെട്ട വിവാദത്തിന് വിരാമമിടാൻ വിദ്യാഭ്യാസ വകുപ്പ് നീക്കം തുടങ്ങി. കഴിഞ്ഞ ഒക്ടോബർ മുതൽ നടത്തിയ എല്ലാ പരീക്ഷകളും സ്കോളർഷിപ്പ് പദ്ധതിയും പൂർണമായി റദ്ദാക്കിയ സാഹചര്യത്തിൽ വിഷയം അവസാനിച്ചുവെന്നാണ് വകുപ്പിന്റെ നിലപാട്. ഇതോടെ സംഭവത്തിൽ ഉദ്യോഗസ്ഥർക്കെതിരെ കടുത്ത നടപടികളിലേക്ക് കടക്കേണ്ടതില്ലെന്നും വകുപ്പ് തീരുമാനിച്ചിട്ടുണ്ട്. ഇതുസംബന്ധിച്ച വിശദമായ റിപ്പോർട്ട് പൊതുവിദ്യാഭ്യാസ ഡയറക്ടർ വിദ്യാഭ്യാസ മന്ത്രിക്ക് കൈമാറി.
ആർ.എസ്.എസ് പോഷകസംഘടനയായ ബാലഗോകുലത്തിന്റെ പ്രസിദ്ധീകരണമായ 'മയിൽപ്പീലി' മാസികയുമായി സഹകരിച്ച് ദേശീയ അധ്യാപക പരിഷത്താണ് (എൻ.ടി.യു) സ്കോളർഷിപ്പ് പരീക്ഷ സംഘടിപ്പിച്ചത്. സംസ്ഥാനത്തെ എൽ.പി, യു.പി, ഹൈസ്കൂൾ വിദ്യാർഥികൾക്കായി 'യംഗ് സ്കോളർ എക്സാം' എന്ന പേരിലായിരുന്നു പദ്ധതി. വിവിധ രാഷ്ട്രീയ പാർട്ടികളുമായി ബന്ധമുള്ള അധ്യാപക സംഘടനകൾ മുൻകാലങ്ങളിലും സമാനമായ ക്വിസ് മത്സരങ്ങളും സ്കോളർഷിപ്പുകളും സംഘടിപ്പിക്കാറുണ്ടെന്നും അതിനെല്ലാം സാധാരണ നിലയിൽ അനുമതി നൽകാറുണ്ടെന്നുമാണ് ഡയറക്ടർ മന്ത്രിക്ക് നൽകിയ റിപ്പോർട്ടിലെ വിശദീകരണം.
നാല് ഘട്ടങ്ങളിലായി നിശ്ചയിച്ചിരുന്ന പരീക്ഷയുടെ ആദ്യ രണ്ട് ഘട്ടങ്ങൾ ഇതിനോടകം പൂർത്തിയായിരുന്നു. വിദ്യാഭ്യാസ മന്ത്രിയുടെ അറിവില്ലാതെയാണ് പരീക്ഷയ്ക്ക് അനുമതി നൽകിയതെന്ന വിവരം പുറത്തുവന്നതോടെ പ്രതിപക്ഷം പ്രതിഷേധം കടുപ്പിച്ചിരുന്നു. തുടർന്ന് പരീക്ഷയ്ക്കു നൽകിയ അനുമതി അടിയന്തരമായി പിൻവലിക്കാൻ മന്ത്രി നിർദേശിക്കുകയായിരുന്നു. രാഷ്ട്രീയ വിവാദം കൂടുതൽ ആളിക്കത്തുന്നത് ഒഴിവാക്കാനാണ് തുടർനടപടികൾ വേണ്ടെന്നുവെച്ച് വിഷയം വേഗത്തിൽ അവസാനിപ്പിക്കാൻ വകുപ്പ് ശ്രമിക്കുന്നത്.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0