സുരക്ഷാ ഭീഷണിയും വൻ ജനത്തിരക്കും; തമിഴ്‌നാട് മുഖ്യമന്ത്രി വിജയ്‌യുടെ ലണ്ടൻ പരിപാടി റദ്ദാക്കി

ലണ്ടൻ: സുരക്ഷാ ആശങ്കകളെത്തുടർന്ന് തമിഴ്‌നാട് മുഖ്യമന്ത്രി വിജയ് ലണ്ടനിൽ പങ്കെടുക്കേണ്ടിയിരുന്ന പൊതുപരിപാടി റദ്ദാക്കി. ലണ്ടനിലെ ഏറ്റവും ഉയരം കൂടിയ കെട്ടിടമായ 'ദി ഷാർഡിന്' സമീപം ആരാധകരെ കാണുന്നതിനായി നിശ്ചയിച്ചിരുന്ന പരിപാടിയാണ് അവസാന നിമിഷം ഒഴിവാക്കിയത്. വിജയ്‌യെ കാണാനായി മണിക്കൂറുകൾക്ക് മുൻപേ തന്നെ നൂറുകണക്കിന് ആരാധകരും അനുയായികളും സ്ഥലത്ത് തടിച്ചുകൂടിയിരുന്നു. എന്നാൽ, അനിയന്ത്രിതമായ ജനക്കൂട്ടം മൂലം സുരക്ഷാ ഭീഷണിയുണ്ടെന്ന് ചൂണ്ടിക്കാട്ടി ലണ്ടൻ മെട്രോപൊളിറ്റൻ പോലീസ് പരിപാടിക്ക് അനുമതി നിഷേധിക്കുകയായിരുന്നു. തുടർന്ന്, വിജയ്‌യുടെ ടീം അംഗങ്ങൾ ഉച്ചഭാഷിണിയിലൂടെയാണ് പരിപാടി റദ്ദാക്കിയ വിവരം ജനങ്ങളെ അറിയിച്ചത്. പൊതുജനങ്ങളുടെ സുരക്ഷ പ്രധാനമാണെന്നും ലണ്ടൻ പോലീസിന്റെ നിർദ്ദേശം മാനിച്ചാണ് തീരുമാനമെന്നും സംഘാടകർ വ്യക്തമാക്കി. ദൂരസ്ഥലങ്ങളിൽ നിന്നടക്കം പ്രിയനേതാവിനെ കാണാനെത്തിയ ആരാധകർ വലിയ നിരാശയോടെയാണ് മടങ്ങിയത്.

വിദേശ നിക്ഷേപം ആകർഷിക്കുന്നതിനായി യുകെ സന്ദർശനത്തിലാണ് തമിഴ്‌നാട് മുഖ്യമന്ത്രി. സുരക്ഷാ കാരണങ്ങളാൽ തങ്ങൾ തങ്ങുന്ന ഹോട്ടലിന് മുന്നിലോ സഞ്ചരിക്കുന്ന വഴികളിലോ കാത്തുനിൽക്കരുതെന്ന് വിജയ്‌യുടെ പാർട്ടിയായ തമിഴക വെട്രി കഴകം ആരാധകരോട് അഭ്യർത്ഥിച്ചു.