യു.എ.ഇയിലെ മുഴുവൻ ഇന്ത്യൻ പൗരന്മാരും മതിയായ ആരോഗ്യ ഇൻഷുറൻസ് ഉറപ്പാക്കണമെന്ന് ഇന്ത്യൻ മിഷനുകൾ

അബുദാബി: യു.എ.ഇയിൽ താമസിക്കുന്നവരും ഇവിടേക്ക് സന്ദർശനത്തിനായി എത്തുന്നവരുമായ മുഴുവൻ ഇന്ത്യൻ പൗരന്മാരും മതിയായ ആരോഗ്യ ഇൻഷുറൻസ് പരിരക്ഷ ഉറപ്പാക്കണമെന്ന് അബുദാബിയിലെ ഇന്ത്യൻ അംബാസഡറും ദുബായിലെ കോൺസുലേറ്റും നിർദ്ദേശം നൽകി. അപ്രതീക്ഷിതമായി ഉണ്ടാകുന്ന ആരോഗ്യപ്രശ്നങ്ങളിലും അടിയന്തര സാഹചര്യങ്ങളിലും മതിയായ ഇൻഷുറൻസ് ഇല്ലാത്തതു കാരണം പല പ്രവാസികളും വലിയ സാമ്പത്തിക ബാധ്യത നേരിടുന്നുണ്ടെന്ന് അധികൃതർ വ്യക്തമാക്കി. ചികിത്സാ ചെലവുകൾ താങ്ങാൻ കഴിയാതെ രോഗികളും കുടുംബാംഗങ്ങളും വലിയ പ്രതിസന്ധിയിലാകുന്ന നിരവധി കേസുകൾ റിപ്പോർട്ട് ചെയ്യപ്പെടുന്നുണ്ടെന്നും അവർ കൂട്ടിച്ചേർത്തു.

സന്ദർശക വിസയിലും ടൂറിസ്റ്റ് വിസയിലും യു.എ.ഇയിൽ എത്തുന്നവർ യാത്ര തിരിക്കുന്നതിന് മുൻപ് തന്നെ ക്യാഷ്‌ലെസ് സൗകര്യങ്ങളോടുകൂടിയ അനുയോജ്യമായ ഇൻഷുറൻസ് എടുത്തിരിക്കണമെന്ന് അധികൃതർ ഓർമ്മിപ്പിച്ചു. അടിയന്തര സാഹചര്യങ്ങളിൽ രോഗികളെ നാട്ടിലെത്തിക്കുന്നതിനുള്ള ചെലവുകളും ഇൻഷുറൻസിൽ ഉൾപ്പെടുത്തിയിരിക്കണം.

സാധാരണക്കാരായ പ്രവാസി തൊഴിലാളികൾക്കായി ഇന്ത്യൻ കോൺസുലേറ്റ് കുറഞ്ഞ നിരക്കിലുള്ള ലൈഫ് പ്രൊട്ടക്ഷൻ പ്ലാൻ ഇൻഷുറൻസ് പദ്ധതികളും ഇതിനോടകം നടപ്പിലാക്കിയിട്ടുണ്ട്. സ്വാഭാവികമോ അപകടകരമോ ആയ മരണങ്ങൾ, അപകടങ്ങൾ മൂലമുള്ള വൈകല്യം തുടങ്ങിയവയ്ക്ക് സാമ്പത്തിക പരിരക്ഷ നൽകുന്ന ഈ പദ്ധതി 2025-ൽ കൂടുതൽ വിപുലീകരിച്ചിരുന്നു. 18 മുതൽ 69 വയസ്സു വരെയുള്ള തൊഴിലാളികൾക്ക് പ്രതിവർഷം വെറും 32 ദിർഹം പ്രീമിയത്തിൽ 35,000 ദിർഹത്തിന്റെ പരിരക്ഷയാണ് ഈ പദ്ധതി വാഗ്ദാനം ചെയ്യുന്നത്.  

തൊഴിൽ വിസയിൽ യു.എ.ഇയിൽ കഴിയുന്നവരും അവരുടെ ആശ്രിതരും, തങ്ങളുടെ നിലവിലെ ഇൻഷുറൻസ് പരിരക്ഷ യു.എ.ഇയിലെ മുഴുവൻ ചികിത്സാ ചെലവുകൾക്കും നാട്ടിലേക്കുള്ള യാത്രയ്ക്കും മതിയായതാണോ എന്ന് ഉറപ്പുവരുത്തണമെന്ന് അധികൃതർ ആവശ്യപ്പെട്ടു. ഈ സുപ്രധാന മാർഗ്ഗനിർദ്ദേശം ഇംഗ്ലീഷ്, ഹിന്ദി, മലയാളം, തെലുങ്ക് എന്നീ ഭാഷകളിൽ സാമൂഹ്യ മാധ്യമങ്ങളിലൂടെ പ്രസിദ്ധീകരിച്ചിട്ടുണ്ട്.