എസ് ഐ ആര്‍: അപേക്ഷകൾ ഡിസംബർ നാല് വരെ സ്വീകരിക്കും 

തിരുവനന്തപുരം: വോട്ടർപ്പട്ടികയുടെ എസ് ഐ ആറിനുള്ള ഫോറങ്ങളുടെ വിതരണം, ശേഖരണം, ഡിജിറ്റൈസേഷൻ എന്നിവ പൂർത്തിയാക്കുന്നതിനുള്ള അപേക്ഷകൾ ഡിസംബർ നാല് വരെ സ്വീകരിക്കുമെന്ന് മുഖ്യ തിരഞ്ഞെടുപ്പ് ഓഫീസർ രത്തൻ യു ഖേൽക്കർ അറിയിച്ചു. ഓരോ ജില്ലക്കും ജോലി പൂർത്തിയാക്കുന്നതിന് അവരുടേതായ സമയപരിധി നിശ്ചയിക്കാനുള്ള സൗകര്യം നൽകിയിട്ടുണ്ടെന്നും അദ്ദേഹം ചൂണ്ടിക്കാട്ടി. അതേസമയം, ഷെഡ്യൂളിന് കുറച്ച് ദിവസം മുമ്പ് പ്രക്രിയ പൂർത്തിയാക്കാൻ കഴിയുമെന്നും എസ് ഐ ആർ സമയത്ത് ഒഴിവാക്കപ്പെട്ട ഏതെങ്കിലും വോട്ടർമാരെ കണ്ടെത്താൻ അധിക സമയം ലഭ്യമാകുമെന്നും രത്തൻ യു ഖേൽക്കർ വിശദീകരിച്ചു. ഡിജിറ്റൈസേഷൻ പ്രക്രിയ പൂർത്തിയായ ശേഷം, ഒമ്പതിന് കരട് വോട്ടർപ്പട്ടിക പ്രസിദ്ധീകരിക്കുമെന്നും അവകാശവാദങ്ങളും എതിർപ്പുകളും ഉന്നയിക്കാൻ അനുവദിക്കുമെന്നും അദ്ദേഹം കൂട്ടിച്ചേർത്തു. 

കൂട്ടായ പ്രക്രിയയിലൂടെ, നാലിന് മുമ്പ് ജോലി പൂർത്തിയാക്കാനാണ് ശ്രമിക്കുന്നത്. പല മേഖലകളിലും ബൂത്ത് ലെവൽ ഓഫീസർമാർ (ബി എൽ ഒ) ഫോറങ്ങളുടെ വിതരണവും ശേഖരണവും ഇതിനകം പൂർത്തിയാക്കിയിട്ടുണ്ട്. അവയുടെ ഡിജിറ്റൈസേഷൻ പ്രക്രിയ ഉടൻ തന്നെ പൂർത്തിയാക്കും. ഡിജിറ്റൈസേഷനായി ആളുകൾക്ക് നേരിട്ട് ഫോമുകൾ സമർപ്പിക്കാൻ കഴിയുന്ന നിരവധി സ്ഥലങ്ങളിൽ ക്യാമ്പുകൾ സജ്ജീകരിച്ചിട്ടുണ്ട്. വിദേശ വോട്ടർമാർക്കായി കോൾ സെൻ്ററും ഇമെയിൽ ഐ ഡിയും  ഇവർക്ക് വേണ്ടി ഫോമുകൾ സമർപ്പിക്കാൻ മറ്റാരെയെങ്കിലും അധികാരപ്പെടുത്താനുള്ള സൗകര്യവും സജ്ജീകരിച്ചിട്ടുണ്ട്.