ഇന്ത്യയിൽ 17.5 ബില്യൺ ഡോളർ നിക്ഷേപിക്കാനൊരുങ്ങി മൈക്രോസോഫ്റ്റ്

Dec 12, 2025 - 14:11

ന്യൂഡൽഹി: ഇന്ത്യയിൽ ഏഷ്യയിലെ ഏറ്റവും വലിയ നിക്ഷേപത്തിനൊരുങ്ങി ലോകത്തിലെ പ്രമുഖ ടെക് സ്ഥാപനമായ മൈക്രോസോഫ്റ്റ്. എ ഐ വ്യാപനം വർദ്ധിപ്പിക്കുന്നതിനു അടുത്ത നാല് വർഷത്തിനുള്ളിൽ ഇന്ത്യയിൽ 17.5 ബില്യൺ ഡോളർ നിക്ഷേപിക്കുമെന്ന് മൈക്രോസോഫ്റ്റ് പ്രഖ്യാപിച്ചു. 2026 മുതൽ 2029 വരെ ഇന്ത്യയുടെ ക്ലൗഡ്, എ ഐ അടിസ്ഥാന സൗകര്യങ്ങൾ, നൈപുണ്യ വികസനം എന്നിവ ലക്ഷ്യമിട്ടാണ് ഈ നിക്ഷേപം. മൈക്രോസോഫ്റ്റ് ചെയർമാനും സി ഇ ഒ യുമായ സത്യ നദെല്ല പ്രധാനമന്ത്രി നരേന്ദ്ര മോദിയുമായി നടത്തിയ കുടിക്കാഴ്‌ച്ചയ്ക്ക് ശേഷമാണ് പ്രഖ്യാപനം. ക്ലൗഡ്, എ ഐ അടിസ്ഥാന സൗകര്യങ്ങൾ വികസിപ്പിക്കുക, ജീവനക്കാർക്കായി നൈപുണ്യ വികസന പരിപാടികൾ ശക്തിപ്പെടുത്തുക, ഹൈദരാബാദ്, ചെന്നൈ, പൂനെ തുടങ്ങിയ നഗരങ്ങളിലെ നിലവിലുള്ള ഡാറ്റാ സെൻ്ററുകൾ വികസിപ്പിക്കുക എന്നിവയാണ് നിക്ഷേപത്തിൻ്റെ പ്രധാന ലക്ഷ്യങ്ങൾ. ഏഷ്യയിൽ മൈക്രോസോഫ്റ്റ് നടത്തുന്ന ഏറ്റവും വലിയ നിക്ഷേപമാണിത്.