മാറിക്കൊണ്ടിരിക്കുന്ന ലോകത്ത് ഒരു ചക്രവര്‍ത്തിയെ വേണ്ട: ട്രംപിനെതിരെ ബ്രസീല്‍ പ്രസിഡന്റ്

റിയോ ഡി ജനീറോ: ബ്രിക്സ് രാജ്യങ്ങള്‍ക്ക് അധിക തീരുവ ചുമത്തുമെന്ന യുഎസ് പ്രസിഡന്റ് ഡൊണാള്‍ഡ് ട്രംപിന്റെ ഭീഷണിക്കെതിരെ ബ്രസീല്‍ പ്രസിഡന്റ് ലുല ഡ സില്‍വ. ലോകം മാറിയിരിക്കുന്നു. നമുക്ക് ഒരു ചക്രവര്‍ത്തിയെ വേണ്ട എന്ന രൂക്ഷവിമര്‍ശനമാണ് ലുല ഡ സില്‍വ ട്രംപിനെതിരെ ഉന്നയിച്ചത്. അമേരിക്കയുടെ സൗഹൃദരാജ്യങ്ങളായ ദക്ഷിണകൊറിയയും ജപ്പാനും ഉള്‍പ്പെടെ 14 രാജ്യങ്ങള്‍ക്ക് മേല്‍ കഴിഞ്ഞ ദിവസം ട്രംപ് ഉയര്‍ന്ന താരിഫ് ചുമത്തിയ സാഹചര്യത്തിലാണ് ലുല ഡ സില്‍വയുടെ പ്രതികരണം. ആഗോള സമ്പദ്വ്യവസ്ഥയെ സംഘടിപ്പിക്കുന്നതിനുള്ള പുതിയ വഴികള്‍ തേടുന്ന രാജ്യങ്ങളുടെ ഒരു കൂട്ടമാണ് ബ്രിക്‌സ്. മറ്റൊരു ശക്തിയുമായും മത്സരിക്കാന്‍ ബ്രിക്‌സ് ആഗ്രഹിക്കുന്നില്ലെന്നായിരുന്നു ദക്ഷിണാഫ്രിക്കന്‍ പ്രസിഡന്റ് സിറില്‍ റമാഫോസയുടെ പ്രതികരണം. താരിഫുകള്‍ നിര്‍ബന്ധത്തിനും സമ്മര്‍ദ്ദത്തിനുമുള്ള ഒരു ഉപകരണമായി ഉപയോഗിക്കരുതെന്നായിരുന്നു ചൈനയുടെ വിദേശകാര്യ മന്ത്രാലയ വക്താവ് മാവോ നിങ്ങിന്റെ പ്രതികരണം. ബ്രിക്‌സ് വിജയ-വിജയ സഹകരണം എന്നതിനെയാണ് പ്രതിനിധീകരിക്കുന്നതെന്നും ഒരു രാജ്യത്തെയും ലക്ഷ്യമിടുന്നില്ലെന്നും അദ്ദേഹം കൂട്ടിച്ചേര്‍ത്തു. എന്നാല്‍ അമേരിക്കയുടെ താരിഫ് ഭീഷണികളോട് ഇന്ത്യ ഇതുവരെ ഔദ്യോഗികമായി പ്രതികരിച്ചിട്ടില്ല.