ഇസ്രായേൽ അധിനിവേശത്തിന് ഇനി ന്യായീകരണമില്ല; ഭരണമൊഴിയൽ പ്രഖ്യാപനവുമായി ഹമാസ്

ഗാസ സിറ്റി: ഗാസ മുനമ്പിലെ തങ്ങളുടെ ഔദ്യോഗിക ഭരണം അവസാനിപ്പിക്കുന്നതായി പലസ്തീൻ സായുധ പ്രസ്ഥാനമായ ഹമാസ് പ്രഖ്യാപിച്ചു. യുഎസ് മധ്യസ്ഥതയിൽ രൂപീകരിച്ച സമാധാന പദ്ധതിയുടെ ഭാഗമായാണ് ഏകദേശം 20 വർഷം നീണ്ടുനിന്ന ഭരണത്തിൽ നിന്നുള്ള ഹമാസിന്റെ ഈ പിന്മാറ്റം. ഇസ്രായേൽ തുടരുന്ന അധിനിവേശത്തിനും ആക്രമണങ്ങൾക്കും ഇനി യാതൊരുവിധ ന്യായീകരണവും ഉണ്ടാകാതിരിക്കാനാണ് ഇത്തരമൊരു നിർണായക തീരുമാനമെന്ന് ഹമാസ് വക്താക്കൾ വ്യക്തമാക്കി.

ഹമാസ് സർക്കാരിന്റെ അടിയന്തര സമിതി തലവൻ മുഹമ്മദ് അൽ-ഫറ ഔദ്യോഗികമായി രാജി സമർപ്പിച്ചു. ഹമാസ് ഭരണം ഒഴിഞ്ഞ സാഹചര്യത്തിൽ, പലസ്തീൻ അതോറിറ്റി മുൻ ഉദ്യോഗസ്ഥൻ അലി ഷാത്തിന്റെ നേതൃത്വത്തിലുള്ള 15 അംഗ 'നാഷണൽ കമ്മിറ്റി ഫോർ ദി അഡ്മിനിസ്ട്രേഷൻ ഓഫ് ഗസ' (NCAG) ഇനി ഗാസയുടെ ഭരണം ഏറ്റെടുക്കും. യുഎൻ മേൽനോട്ടത്തിൽ ഗാസയിലെ ജനങ്ങൾക്ക് അവശ്യ സേവനങ്ങൾ പുനഃസ്ഥാപിക്കുക, പൊതുകാര്യങ്ങൾ നിയന്ത്രിക്കുക എന്നിവയാണ് ഈ സമിതിയുടെ ലക്ഷ്യം. ഭരണപരമായ ചുമതലകൾ പൂർണ്ണമായും ഒഴിഞ്ഞെങ്കിലും തങ്ങളുടെ പക്കലുള്ള ആയുധങ്ങൾ താഴെവെക്കാനോ സുരക്ഷാ ചുമതലകൾ അന്താരാഷ്ട്ര സേനയ്ക്ക് കൈമാറാനോ ഹമാസ് തയ്യാറായിട്ടില്ല. തങ്ങൾ ഒരു പ്രതിരോധ പ്രത്യയശാസ്ത്രമാണെന്നും ആയുധം ഉപേക്ഷിക്കില്ലെന്നും സംഘടന വ്യക്തമാക്കിയിട്ടുണ്ട്.