ഐഫോണ്‍ 18 പ്രോ സ്വന്തമാക്കാൻ ആപ്പിള്‍ സ്റ്റോറുകളില്‍ വന്‍ തിരക്ക്

ന്യൂഡല്‍ഹി: ആപ്പിളിന്റെ ഏറ്റവും പുതിയ ഫ്ലാഗ്ഷിപ്പ് സ്മാർട്ട്ഫോണുകളായ ഐഫോണ്‍ 18 പ്രോ, ഐഫോണ്‍ 18 പ്രോ മാക്‌സ് മോഡലുകളുടെ വിൽപ്പന ആരംഭിച്ചതോടെ രാജ്യത്തുടനീളമുള്ള ആപ്പിൾ സ്റ്റോറുകൾക്ക് മുന്നിൽ വൻ ജനത്തിരക്ക്. ഡല്‍ഹി, മുംബൈ, ബെംഗളൂരു, നോയിഡ തുടങ്ങിയ നഗരങ്ങളിലെ പ്രധാന ആപ്പിള്‍ ഔട്ട്‌ലെറ്റുകള്‍ക്ക് മുന്നില്‍ പുലര്‍ച്ചെ 4 മണി മുതല്‍ തന്നെ ഉപഭോക്താക്കളുടെ നീണ്ട നിര പ്രത്യക്ഷപ്പെട്ടു.   ഫോണ്‍ വിൽപ്പന ആരംഭിക്കുന്നതിന് മണിക്കൂറുകൾക്ക് മുമ്പ് തന്നെ മുൻകൂട്ടി ബുക്ക് ചെയ്തവരും നേരിട്ട് വാങ്ങാനെത്തിയവരും ക്യൂവിൽ ഇടംപിടിച്ചിരുന്നു. പഞ്ചാബ്, ഹരിയാന തുടങ്ങിയ സമീപ സംസ്ഥാനങ്ങളിൽ നിന്നും ആളുകൾ സ്റ്റോറുകളിലേക്ക് ഒഴുകിയെത്തി.

ഇന്ത്യയിൽ ഐഫോണ്‍ 18 പ്രോയുടെ പ്രാരംഭ വില ₹1,64,900-ഉം പ്രോ മാക്‌സ് മോഡലിന്റെ പ്രാരംഭ വില ₹1,79,900-ഉം ആണ്. മെച്ചപ്പെടുത്തിയ എഐ ശേഷിയുള്ള A20 പ്രോ ചിപ്‌സെറ്റ്, വേരിയബിൾ അപർച്ചറോട് കൂടിയ 48 എംപി ഫ്യൂഷൻ ക്യാമറ, കൂളിംഗിനായി പുതിയ വേപ്പർ ചേമ്പർ സാങ്കേതികവിദ്യ എന്നിവയാണ് പ്രധാന ആകർഷണം. പുതിയ ഫീച്ചറുകളും പ്രകടനക്ഷമതയും തന്നെയാണ് പഴയ മോഡലുകളിൽ നിന്ന് ഉയർന്ന തുക നൽകി ഇതിലേക്ക് അപ്‌ഗ്രേഡ് ചെയ്യാൻ പ്രേരിപ്പിക്കുന്നതെന്ന് ക്യൂവിൽ നിന്ന ഉപഭോക്താക്കൾ അഭിപ്രായപ്പെട്ടു. രാജ്യത്തെ പ്രമുഖ നഗരങ്ങളിലെല്ലാം സമാനമായ രീതിയിൽ വൻ വിൽപ്പന തിരക്കാണ് അനുഭവപ്പെടുന്നത്.