ഗ്യാനേഷ് കുമാറിന്റെ രാജി; ഒക്ടോബർ 10-ന് സി.ജെ.പി ജന്തർമന്തറിലേക്ക്

ന്യൂഡൽഹി: ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജിയും തെരഞ്ഞെടുപ്പ് കമ്മീഷനിൽ (ഇ.സി.ഐ) സമഗ്രമായ വ്യവസ്ഥാപിത പരിഷ്കാരങ്ങളും ആവശ്യപ്പെട്ട് ശക്തമായ പ്രതിഷേധത്തിനൊരുങ്ങി കോക്രൊച്ച് ജനതാ പാർട്ടി (സി.ജെ.പി). വരാനിരിക്കുന്ന ഒക്ടോബർ 10-ന് ഡൽഹി ജന്തർമന്തറിൽ കൂറ്റൻ പ്രതിഷേധ പരിപാടി സംഘടിപ്പിക്കുന്നതിന്റെ ഭാഗമായി സി.ജെ.പി ഡൽഹി പോലീസിന് ഔദ്യോഗികമായി നോട്ടീസ് നൽകി. 

പാർട്ടി കോ-കൺവീനർ സൗരവ് ദാസിന്റെ നേതൃത്വത്തിലാണ് പാർലമെന്റ് സ്ട്രീറ്റ് പോലീസ് സ്റ്റേഷനിലെത്തി നോട്ടീസ് കൈമാറിയത്. രാജ്യത്തിന്റെ വിവിധ ഭാഗങ്ങളിൽ നിന്നുള്ള യുവാക്കളും പാർട്ടി പ്രവർത്തകരും ഒക്ടോബർ 10-ന് തലസ്ഥാന നഗരിയിൽ ഒത്തുചേരുമെന്ന് അദ്ദേഹം വ്യക്തമാക്കി. ക്രമസമാധാന പാലനത്തിനും ഗതാഗത നിയന്ത്രണങ്ങൾക്കുമായി പോലീസിന്റെ പൂർണ്ണ സഹകരണവും അഭ്യർത്ഥിച്ചിട്ടുണ്ട്. സമരത്തിനായുള്ള എല്ലാ നിയമപരമായ നടപടിക്രമങ്ങളും പൂർത്തിയാക്കിയിട്ടുണ്ടെന്ന് ദാസ് മാധ്യമങ്ങളോട് പറഞ്ഞു. "ഗ്യാനേഷ് കുമാർ രാജിവെച്ചാലും ഞങ്ങൾ പിന്മാറില്ല. ഇലക്ഷൻ കമ്മീഷനിൽ കൃത്യമായ പരിഷ്കാരങ്ങൾ വേണം. അല്ലാത്തപക്ഷം ഈ സ്ഥാപനത്തിന് ഒരിക്കലും നീതി പുലർത്താനാകില്ല. ഗ്യാനേഷ് കുമാറിന്റെ രാജിക്കൊപ്പം അദ്ദേഹത്തെ അറസ്റ്റ് ചെയ്യുകയും വേണം," സൗരവ് ദാസ് മാധ്യമങ്ങളോട് പറഞ്ഞു.