നേപ്പാൾ പ്രളയ ദുരന്തം: മരണസംഖ്യ 950 കടന്നു; കാണാമറയത്ത് 2,500 ജീവനുകൾ

കാഠ്മണ്ഡു: രാജ്യത്തിന്റെ വിവിധ ഭാഗങ്ങളിലുണ്ടായ മിന്നൽ പ്രളയത്തിലും ഉരുൾപൊട്ടലിലും മരിച്ചവരുടെ സംഖ്യ 950 കടന്നു. തുടർച്ചയായി പെയ്തിറങ്ങിയ കനത്ത മഴയെത്തുടർന്ന് അണക്കെട്ടുകളും നദികളും കവിഞ്ഞൊഴുകിയതാണ് വൻ ദുരന്തത്തിന് കാരണമായത്. 2,500-ലധികം ആളുകളെ ഇനിയും കണ്ടെത്താനായിട്ടില്ലെന്ന് നേപ്പാൾ ദുരന്തനിവാരണ സേന അറിയിച്ചു. റോഡുകളും പാലങ്ങളും തകർന്നടിഞ്ഞതോടെ പല വിദൂര ഗ്രാമങ്ങളും പൂർണ്ണമായും ഒറ്റപ്പെട്ട നിലയിലാണ്. വീടുകളും കെട്ടിടങ്ങളും വെള്ളത്തിനടിയിലായി.

അടിയന്തര രക്ഷാപ്രവർത്തനത്തിനായി കരസേനയെയും സുരക്ഷാ സേനയെയും പൂർണ്ണമായി രംഗത്തിറക്കിയിട്ടുണ്ട്. ഹെലികോപ്റ്ററുകളും ബോോട്ടുകളും ഉപയോഗിച്ചാണ് ഒറ്റപ്പെട്ടുപോയ ആളുകളെ സുരക്ഷിത സ്ഥാനങ്ങളിലേക്ക് മാറ്റുന്നത്. ജലവൈദ്യുത പദ്ധതികളുടെ ടണലുകൾക്കുള്ളിൽ നിരവധിയാളുകൾ കുടുങ്ങിക്കിടക്കുന്നതായി സംശയമുണ്ട്. കാണാതായവർക്കായുള്ള തിരച്ചിൽ അതീവ ദുഷ്കരമായി തുടരുകയാണ്. കുടിവെള്ളവും ഭക്ഷണവും ലഭിക്കാതെ ആയിരക്കണക്കിന് ആളുകളാണ് ദുരിതാശ്വാസ ക്യാമ്പുകളിൽ കഴിയുന്നത്. പ്രളയബാധിത പ്രദേശങ്ങളിൽ പകർച്ചവ്യാധി ഭീഷണി ഉയരുന്നതും ആശങ്ക വർദ്ധിപ്പിക്കുന്നു.  വിദേശ രാജ്യങ്ങളും സന്നദ്ധ സംഘടനകളും നേപ്പാളിന് അടിയന്തര സഹായങ്ങൾ എത്തിച്ചുതുടങ്ങിയിട്ടുണ്ട്. വരും ദിവസങ്ങളിലും മഴ ശക്തമാകാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.