ബി.പി.എല്‍ വിദ്യാര്‍ത്ഥികളുടെ യൂണിഫോം വിതരണം മുടങ്ങാന്‍ കാരണം കേന്ദ്രമെന്ന് വിദ്യാഭ്യാസ മന്ത്രി

തിരുവനന്തപുരം: ബി.പി.എല്‍ വിഭാഗം വിദ്യാര്‍ത്ഥികളുടെ യൂണിഫോം വിതരണം മുടങ്ങാന്‍ കാരണം കേന്ദ്രമെന്ന് വിദ്യാഭ്യാസ മന്ത്രി വി ശിവന്‍കുട്ടി. കേന്ദ്ര സര്‍ക്കാര്‍ ഫണ്ട് തടഞ്ഞ് വെച്ചതാണ് കാരണമെന്നും  സംസ്ഥാനം ഈ പ്രതിസന്ധി പരിഹരിക്കാന്‍ ശ്രമിക്കുന്നുവെന്നും അദ്ദേഹം പറഞ്ഞു.

സര്‍ക്കാര്‍ ഹൈസ്‌ക്കൂളിനോടും ഹയര്‍ സെക്കന്‍ഡറി സ്‌കൂളിനോടും ചേര്‍ന്നുള്ള 1 മുതല്‍ 8 വരെയുള്ള ക്ലാസുകളിലെ എല്ലാ പെണ്‍കുട്ടികള്‍ക്കും , SC, ST, BPL വിഭാഗങ്ങളിലെ എല്ലാ ആണ്‍ കുട്ടികള്‍ക്കും രണ്ട് സെറ്റ് സൗജന്യ യൂണിഫോമിനുള്ള തുക SSK യില്‍ നിന്നും BRC കള്‍ വഴി അതാത് സ്‌കൂളുകള്‍ക്ക് നല്‍കും. എന്നാല്‍ ഇപ്രകാരം വിതരണം ചെയ്യേണ്ട തുക 2023-24 സ്‌കൂള്‍ വര്‍ഷം മുതല്‍ കേന്ദ്ര സര്‍ക്കാരില്‍ നിന്നും SSKക്ക് ലഭ്യമാകുന്നില്ല.
സംസ്ഥാനത്തെ ഒറ്റക്ക് നില്‍ക്കുന്ന LP, UP സര്‍ക്കാര്‍ സ്‌കൂളുകളിലെയും എയിഡഡ് എല്‍ പി സ്‌കൂളുകളിലെയും 10 ലക്ഷം കുട്ടികള്‍ക്ക് കൈത്തറി വകുപ്പ് വഴി പൊതുവിദ്യാഭ്യാസ വകുപ്പ് 2 സെറ്റ് കൈത്തറി യൂണിഫോം നല്‍കുന്നു. അത് നല്‍കി വരികയാണ്. സര്‍ക്കാര്‍ ഹൈസ്‌ക്കൂളിലും ഹയര്‍ സെക്കന്‍ഡറി സ്‌കൂളിലും 1 മുതല്‍ 8 വരെ ക്ലാസുകളിലെ APL വിഭാഗം കുട്ടികള്‍ക്കും എയിഡഡ് സ്‌കൂളുകളിലെ 1 മുതല്‍ 8 വരെയുള്ള മുഴുവന്‍ കുട്ടികള്‍ക്കും രണ്ട് സെറ്റ് സൗജന്യ യൂണിഫോമിനുള്ള തുക പൊതുവിദ്യാഭ്യാസ വകുപ്പ് നല്‍കുന്നു. നിലവില്‍ ഈ ഇനത്തില്‍ സംസ്ഥാന സര്‍ക്കാര്‍ ഫണ്ട് നല്‍കാന്‍ കുടിശ്ശികയില്ല. ഈ ഇനത്തില്‍ 2025-26 വര്‍ഷത്തേക്കാവശ്യമായ 80.34 കോടി രൂപ നല്‍കുന്നതിനുള്ള ഭരണാനുമതി നല്‍കിയിട്ടുണ്ട്. ഇപ്പോള്‍ കേന്ദ്ര സര്‍ക്കാര്‍ 1500 കോടി രൂപ തടഞ്ഞു വെച്ചതിനാലാണ് ഒരു വിഭാഗം കുട്ടികള്‍ക്ക് കഴിഞ്ഞ മൂന്ന് വര്‍ഷമായി തുക വിതരണം ചെയ്യാന്‍ കഴിയാത്തതെന്നും മന്ത്രി ചൂണ്ടിക്കാട്ടി.