ನಾಸಾಗೆ ವಿದಾಯ ಹೇಳಿದ ಸುನಿತಾ ವಿಲಿಯಮ್ಸ್; 27 ವರ್ಷಗಳ ಐತಿಹಾಸಿಕ ವೃತ್ತಿಜೀವನಕ್ಕೆ ತೆರೆ

ವಾಷಿಂಗ್ಟನ್: 27 ವರ್ಷಗಳ ಸುದೀರ್ಘ ಹಾಗೂ ಐತಿಹಾಸಿಕ ಸೇವೆಯ ನಂತರ ಭಾರತೀಯ ಮೂಲದ ಗಗನಯಾತ್ರಿ ಸುನಿತಾ ವಿಲಿಯಮ್ಸ್ ನಾಸಾದಿಂದ (NASA) ನಿವೃತ್ತರಾಗಿದ್ದಾರೆ. ಕಳೆದ ತಿಂಗಳು 27 ರಂದು ಅವರ ನಿವೃತ್ತಿ ಜಾರಿಗೆ ಬಂದಿದೆ ಎಂದು ನಾಸಾ ಇಂದು ಅಧಿಕೃತವಾಗಿ ಘೋಷಿಸಿದೆ. ಅಂತರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಒಟ್ಟು ಮೂರು ಕಾರ್ಯಾಚರಣೆಗಳ ಮೂಲಕ 608 ದಿನಗಳನ್ನು ಬಾಹ್ಯಾಕಾಶದಲ್ಲಿ ಕಳೆದ ಸುನಿತಾ, ಈ ಸಾಧನೆ ಮಾಡಿದ ನಾಸಾದ ಎರಡನೇ ಗಗನಯಾತ್ರಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 62 ಗಂಟೆಗಳಿಗೂ ಹೆಚ್ಚು ಕಾಲ ನಡೆಸಿದ ಒಂಬತ್ತು ಸ್ಪೇಸ್‌ ವಾಕ್‌ಗಳ ಮೂಲಕ ಅತಿ ಹೆಚ್ಚು ಸ್ಪೇಸ್‌ ವಾಕ್ ಮಾಡಿದ ಮಹಿಳೆ ಎಂಬ ವಿಶ್ವ ದಾಖಲೆಯನ್ನೂ ಅವರು ತಮ್ಮದಾಗಿಸಿಕೊಂಡಿದ್ದಾರೆ. ಅಲ್ಲದೆ ಬಾಹ್ಯಾಕಾಶದಲ್ಲಿ ಮ್ಯಾರಥಾನ್ ಪೂರ್ಣಗೊಳಿಸಿದ ಮೊದಲ ವ್ಯಕ್ತಿ ಎಂಬ ಹೆಗ್ಗಳಿಕೆಯೂ ಇವರಿಗಿದೆ.

2006 ರಲ್ಲಿ 'ಡಿಸ್ಕವರಿ' ನೌಕೆಯ ಮೂಲಕ ಸುನಿತಾ ತಮ್ಮ ಮೊದಲ ಬಾಹ್ಯಾಕಾಶ ಪ್ರಯಾಣ ಬೆಳೆಸಿದರು. ನಂತರ ಅವರು ಎಕ್ಸ್‌ಪೆಡಿಶನ್ 33 ರ ಕಮಾಂಡರ್ ಆಗಿ ಸೇವೆ ಸಲ್ಲಿಸಿದರು. 2024-25ರ ಅವಧಿಯಲ್ಲಿ ಬೋಯಿಂಗ್ ಸ್ಟಾರ್‌ಲೈನರ್ ಮತ್ತು ಸ್ಪೇಸ್‌ ಎಕ್ಸ್ ಕ್ರೂ-9 ರ ಭಾಗವಾಗಿ ನಡೆಸಿದ ಎಕ್ಸ್‌ಪೆಡಿಶನ್ 72 ರ ಕಮಾಂಡರ್ ಜವಾಬ್ದಾರಿಯು ಸುನಿತಾ ಅವರು ಪೂರ್ಣಗೊಳಿಸಿದ ಅತ್ಯಂತ ಕೊನೆಯ ಕಾರ್ಯಾಚರಣೆಯಾಗಿದೆ.

ಬಾಹ್ಯಾಕಾಶ ಯಾತ್ರಿಗಳ ತರಬೇತಿ, ರಷ್ಯಾದ ಕಾರ್ಯಾಚರಣೆಗಳು ಮತ್ತು ಭವಿಷ್ಯದ ಚಂದ್ರಯಾನ ಯೋಜನೆಗಳ ಸಿದ್ಧತೆ ಸೇರಿದಂತೆ ನಾಸಾದ ಹಲವು ನಿರ್ಣಾಯಕ ಭೂ-ಕಾರ್ಯಾಚರಣೆಗಳಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದರು. ಯುಎಸ್ ನೌಕಾಪಡೆಯ ನಿವೃತ್ತ ಕ್ಯಾಪ್ಟನ್ ಆಗಿರುವ ಇವರಿಗೆ 4,000 ಗಂಟೆಗಳಿಗೂ ಹೆಚ್ಚು ಕಾಲ ವಿಮಾನ ಹಾರಾಟ ನಡೆಸಿದ ಅನುಭವವಿದೆ. ಮಾನವ ಬಾಹ್ಯಾಕಾಶ ಪರಿಶೋಧನಾ ಕ್ಷೇತ್ರದ ಮಾರ್ಗದರ್ಶಿ ಮತ್ತು ಮುಂದಿನ ಪೀಳಿಗೆಗೆ ದೊಡ್ಡ ಸ್ಫೂರ್ತಿ ಎಂದು ಬಣ್ಣಿಸುವ ಮೂಲಕ ನಾಸಾ ಸುನಿತಾ ವಿಲಿಯಮ್ಸ್ ಅವರಿಗೆ ಗೌರವಪೂರ್ವಕ ವಿದಾಯ ಕೋರಿದೆ.