ರಂಜಾನ್: ಮುಸ್ಲಿಂ ನೌಕರರ ಕೆಲಸದ ಅವಧಿಯಲ್ಲಿ ಕಡಿತಗೊಳಿಸಿದ ತೆಲಂಗಾಣ ಸರ್ಕಾರ

Feb 19, 2026 - 10:52

ಹೈದರಾಬಾದ್: ರಾಜ್ಯದ ಎಲ್ಲಾ ಮುಸ್ಲಿಂ ಸರ್ಕಾರಿ ನೌಕರರಿಗೆ ರಂಜಾನ್ ಸಮಯದಲ್ಲಿ ಕೆಲಸದ ಅವಧಿಯಲ್ಲಿ ತೆಲಂಗಾಣ ಸರ್ಕಾರವು ವಿನಾಯಿತಿ ನೀಡಿದೆ. ರಂಜಾನ್ ಉಪವಾಸ ಆಚರಿಸುವ ಸರ್ಕಾರಿ ನೌಕರರಿಗೆ ಸಂಜೆ 4 ಗಂಟೆಯವರೆಗೆ ಕೆಲಸದ ಸಮಯವನ್ನು ನಿಗದಿಪಡಿಸಲಾಗಿದೆ. ಉದ್ಯೋಗಿಗಳು ಮನೆಗೆ ತೆರಳಿ ಉಪವಾಸ ಬಿಡಲು (ಇಫ್ತಾರ್) ಅನುಕೂಲ ಮಾಡಿಕೊಡುವ ಉದ್ದೇಶದಿಂದ ಸರ್ಕಾರ ಈ ನಿರ್ದೇಶನ ನೀಡಿದೆ. ತೆಲಂಗಾಣ ಸರ್ಕಾರವು 2026 ಫೆಬ್ರವರಿ 17 ರಂದು ಹೊರಡಿಸಿದ ಮೆಮೊ ಸಂಖ್ಯೆ 677/Poll.B/26 ರ ಮೂಲಕ ಈ ನಿರ್ಧಾರವನ್ನು ತಿಳಿಸಿದೆ. ಶಿಕ್ಷಕರು, ಗುತ್ತಿಗೆ, ಹೊರಗುತ್ತಿಗೆ ನೌಕರರು, ಮಂಡಳಿಗಳು ಮತ್ತು ನಿಗಮಗಳ ನೌಕರರು ಹಾಗೂ ತೆಲಂಗಾಣದಾದ್ಯಂತ ಇರುವ ಸಾರ್ವಜನಿಕ ವಲಯದ ನೌಕರರು ಸೇರಿದಂತೆ ಎಲ್ಲಾ ಮುಸ್ಲಿಂ ಉದ್ಯೋಗಿಗಳಿಗೆ ಈ ಅನುಮತಿಯು ಅನ್ವಯಿಸುತ್ತದೆ.