‘യൂത്ത് കോൺഗ്രസ് പറഞ്ഞാൽ തല്ലിക്കൊല്ലാനും പൊലീസ് തയ്യാറാകും’; കോൺഗ്രസ് നേതാവിന്റെ പ്രസംഗം വിവാദത്തിൽ

മലപ്പുറം: യൂത്ത് കോൺഗ്രസ് പറഞ്ഞാൽ ആളുകളെ തല്ലിക്കൊല്ലാൻ പോലും പൊലീസ് തയ്യാറാകുമെന്ന തരത്തിലുള്ള പരാമർശവുമായി കോൺഗ്രസ് നേതാവിന്റെ വിവാദ പ്രസംഗം. വളാഞ്ചേരിയിൽ നടന്ന കോൺഗ്രസ് പരിപാടിക്കിടെയാണ് കെപിസിസി അംഗം ഇഫ്തിഖാറുദ്ദീൻ വിവാദ പരാമർശം നടത്തിയത്. പൊലീസ് ഇപ്പോൾ നമ്മുടെ കയ്യിലാണെന്നും കഴിഞ്ഞ സർക്കാർ വാങ്ങിക്കൊടുത്ത ലാത്തികൊണ്ട് പൊലീസ് ആളുകളെ അടിച്ചുതകർത്തുവെന്നും തങ്ങൾ പറഞ്ഞിട്ടാണ് പൊലീസ് അടിച്ചതെന്ന് പറയാൻ മടിയില്ലെന്നും അദ്ദേഹത്തിന്റെ പ്രസംഗത്തിന്റെ ദൃശ്യങ്ങളിൽ വ്യക്തമാകുന്നു. 

തിരുവനന്തപുരം യൂണിവേഴ്സിറ്റി ഹോസ്റ്റലുമായി ബന്ധപ്പെട്ട് യൂത്ത് കോൺഗ്രസ്–എസ്എഫ്ഐ പ്രവർത്തകർ തമ്മിൽ സംഘർഷമുണ്ടായതും പൊലീസ് ലാത്തിച്ചാർജ് നടത്തിയതും സംബന്ധിച്ച രാഷ്ട്രീയ വിവാദങ്ങൾക്കിടെയാണ് പ്രസംഗം പുറത്തുവന്നത്.

സംഭവത്തിൽ ഇരുവിഭാഗവും പരസ്പരം ആരോപണങ്ങൾ ഉന്നയിച്ചിരുന്നു. സംഘർഷം നിയന്ത്രിക്കുന്നതിനിടെ പൊലീസ് ലാത്തിച്ചാർജും കണ്ണീർവാതക പ്രയോഗവും നടത്തിയിരുന്നു. ഇതിന് പിന്നാലെയാണ് പൊലീസിന്റെ നടപടിയും രാഷ്ട്രീയ ഇടപെടലും സംബന്ധിച്ച വിവാദങ്ങൾ ശക്തമായത്.

കോൺഗ്രസ് നേതാവിന്റെ പ്രസംഗത്തിലെ പൊലീസ് സംബന്ധിച്ച പരാമർശം പുറത്തുവന്നതോടെ സംഭവത്തിൽ പുതിയ രാഷ്ട്രീയ വിവാദത്തിനും തുടക്കമായിരിക്കുകയാണ്.