ഗതാഗതക്കുരുക്ക് രൂക്ഷം; കാസറഗോഡ് പഴയ ബസ് സ്റ്റാന്റ് ബഹിഷ്‌കരിക്കുമെന്ന് സ്വകാര്യ ബസുടമകൾ

കാസർകോട്: നഗരത്തിലെ അശാസ്ത്രീയവും നിയമവിരുദ്ധവുമായ പാർക്കിംഗും വഴിയോരക്കച്ചവടവും മൂലമുള്ള ഗതാഗതക്കുരുക്കിന് അടിയന്തര പരിഹാരം കാണാത്ത പക്ഷം പഴയ ബസ് സ്റ്റാന്റ് ബഹിഷ്‌കരിക്കുമെന്ന് കേരള പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷൻ താലൂക്ക് കമ്മിറ്റി. ഒക്ടോബർ 10നകം ഫലപ്രദമായ നടപടി ഉണ്ടായില്ലെങ്കിൽ സ്വകാര്യ ബസുകൾ പുതിയ ബസ് സ്റ്റാന്റിൽ സർവീസ് അവസാനിപ്പിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു.

പുതിയ ബസ് സ്റ്റാന്റ് സർക്കിൾ മുതൽ സുൽത്താൻ ഗോൾഡ്, ശോഭിക വെഡ്ഡിംഗ്‌സ്, പുലിക്കുന്ന് റോഡിലെ മെഡിക്കൽ ഷോപ്പ് സമുച്ചയം വരെയുള്ള ഭാഗങ്ങളിൽ ഗതാഗതക്കുരുക്ക് രൂക്ഷമാണെന്ന് ബസുടമകൾ പറഞ്ഞു. റോഡരികിലെ അനധികൃത പാർക്കിംഗും ഫുട്പാത്തിലെ വഴിയോരക്കച്ചവടവുമാണ് പ്രധാന പ്രശ്‌നങ്ങളെന്നും അവർ ചൂണ്ടിക്കാട്ടി. പള്ളിയുടെ മുൻവശം മുതൽ ബദരിയ ഹോട്ടലിന്റെ പരിസരം വരെ ഉന്തുവണ്ടികൾ, വസ്ത്ര വ്യാപാരികൾ, പഴം-ഫ്രൂട്ട്‌സ് കച്ചവടക്കാർ തുടങ്ങിയവർ റോഡരികിൽ നിരന്നുനിൽക്കുന്നത് ഗതാഗത തടസ്സത്തിന് കാരണമാകുന്നുണ്ട്. ഇതിനുപുറമെ ഇരുചക്ര വാഹനങ്ങൾ പാർക്ക് ചെയ്യുന്നതിനായി റോഡിൽ നഗരസഭ പ്രത്യേകം സ്ഥലം അടയാളപ്പെടുത്തിയിട്ടുണ്ടെന്നും ബസുടമകൾ ആരോപിച്ചു. 

വഴിയോരക്കച്ചവടക്കാർക്കായി പുതിയ ബസ് സ്റ്റാന്റ് പരിസരത്ത് നഗരസഭ 29 കടമുറികൾ നിർമിച്ചുനൽകിയിട്ടും പഴയ ബസ് സ്റ്റാന്റ് പരിസരത്തെ കൈയേറ്റങ്ങൾക്കും വഴിയോരക്കച്ചവടത്തിനും കുറവുണ്ടായിട്ടില്ല. നഗരത്തിലെ റോഡുകളിലെ തടസ്സങ്ങൾ അടിയന്തരമായി നീക്കി ഗതാഗതം സുഗമമാക്കാൻ അധികൃതർ നടപടി സ്വീകരിക്കണമെന്നും ഒക്ടോബർ 10നകം പ്രശ്‌നങ്ങൾക്ക് പരിഹാരം കണ്ടില്ലെങ്കിൽ പുതിയ ബസ് സ്റ്റാന്റിൽ സർവീസ് അവസാനിപ്പിക്കുമെന്നും ഭാരവാഹികൾ മുന്നറിയിപ്പ് നൽകി.