ವಕ್ಫ್ ತಿದ್ದುಪಡಿ; ಭಾಗಶಃ ತಡೆಯಾಜ್ಞೆ ಭರವಸೆದಾಯಕ - ಗ್ರ್ಯಾಂಡ್ ಮುಫ್ತಿ

Sep 16, 2025 - 12:33

ಕೋಝಿಕ್ಕೋಡ್: ವಕ್ಫ್ ಕಾನೂನು ತಿದ್ದುಪಡಿ ಮಸೂದೆಗೆ ಭಾಗಶಃ ತಡೆಯಾಜ್ಞೆ ನೀಡಿದ ಸುಪ್ರೀಂ ಕೋರ್ಟ್ ಕ್ರಮವು ಭರವಸೆ ಮೂಡಿಸಿದೆ ಎಂದು ಇಂಡಿಯನ್ ಗ್ರ್ಯಾಂಡ್ ಮುಫ್ತಿ ಸುಲ್ತಾನುಲ್ ಉಲಮಾ ಎಪಿ ಅಬೂಬಕರ್ ಮುಸ್ಲಿಯಾರ್ ಹೇಳಿದ್ದಾರೆ. ವಕ್ಫ್‌ನ ಪಾರದರ್ಶಕತೆ ಮತ್ತು ಸ್ವರೂಪವನ್ನು ನಾಶಪಡಿಸುವಂತೆ ಸಿದ್ಧಪಡಿಸಲಾದ ತಿದ್ದುಪಡಿ ಮಸೂದೆಯ ಕೆಲವು ವಿಧಿಗಳಿಗೆ ತಡೆಯಾಜ್ಞೆ ನೀಡಿರುವುದು ಸಾಂವಿಧಾನಿಕ ಹಕ್ಕುಗಳ ರಕ್ಷಣೆ ಮತ್ತು ಪ್ರಜಾಸತ್ತಾತ್ಮಕ ಹೋರಾಟಗಳಿಗೆ ಬಲ ತುಂಬುತ್ತದೆ.

ವಕ್ಫ್ ಕಾನೂನಿನಲ್ಲಿನ ಮಿತಿಮೀರಿದ ಹಸ್ತಕ್ಷೇಪವು, ಧರ್ಮವನ್ನು ಆಚರಿಸಲು ನಾಗರಿಕರಿಗೆ ಸಂವಿಧಾನವು ನೀಡಿರುವ ಸ್ವಾತಂತ್ರ್ಯವನ್ನು ಅಂತಿಮವಾಗಿ ಹತ್ತಿಕ್ಕುತ್ತದೆ. ಇದು ಈ ದೇಶದ ನಾಗರಿಕ ಹಕ್ಕುಗಳನ್ನು ಮತ್ತು ಸಹಿಷ್ಣುತೆಯನ್ನು ಪ್ರಶ್ನಿಸಿತ್ತು. ಸುಪ್ರೀಂ ಕೋರ್ಟ್‌ನ ಕ್ರಮವು ಪ್ರಜಾಪ್ರಭುತ್ವವಾದಿಗಳಲ್ಲಿ ಭರವಸೆ ಮತ್ತು ಆತ್ಮವಿಶ್ವಾಸವನ್ನು ಮೂಡಿಸಿದೆ. ಈ ವಿಷಯದಲ್ಲಿ ಪ್ರಜಾಸತ್ತಾತ್ಮಕ ಮತ್ತು ಶಾಂತಿಯುತವಾದ ಪ್ರಬುದ್ಧ ಹಸ್ತಕ್ಷೇಪಗಳು ಎಲ್ಲರ ಕಡೆಯಿಂದಲೂ ಮುಂದುವರಿಯಬೇಕು ಎಂದು ಗ್ರ್ಯಾಂಡ್ ಮುಫ್ತಿ ಹೇಳಿದರು.