ದೇಶದಲ್ಲೇ ಮೊದಲ ಬಾರಿಗೆ ಬಣ್ಣದ ನಾಣ್ಯ ಬಿಡುಗಡೆ; ತೂಕ 35 ಗ್ರಾಂ

ಕೋಲ್ಕತ್ತ: ಭಾರತದಲ್ಲಿ ಇದೇ ಮೊದಲ ಬಾರಿಗೆ ವರ್ಣ ನಾಣ್ಯವನ್ನು (Coloured Coin) ಬಿಡುಗಡೆ ಮಾಡಲಾಗಿದೆ. ಭಾರತೀಯ ರೈಲ್ವೆಯ ವಿದ್ಯುದೀಕರಣದ ಶತಮಾನೋತ್ಸವದ ಸ್ಮರಣಾರ್ಥವಾಗಿ 100 ರೂಪಾಯಿ ಮುಖಬೆಲೆಯ ಈ ವರ್ಣ ನಾಣ್ಯವನ್ನು ರಿಸರ್ವ್ ಬ್ಯಾಂಕ್ ಬಿಡುಗಡೆ ಮಾಡಿದೆ. 1925ರಲ್ಲಿ ಮುಂಬೈ-ಕುರ್ಲಾ ಮಾರ್ಗದಲ್ಲಿ ಭಾರತದ ಮೊದಲ ವಿದ್ಯುತ್ ರೈಲು ಸಂಚಾರ ಆರಂಭವಾಗಿತ್ತು.

ಈ ನಾಣ್ಯದ ಒಂದು ಭಾಗದಲ್ಲಿ ಭಾರತೀಯ ರೈಲ್ವೆಯ ಆಧುನಿಕ ಮುಖವಾದ ವಂದೇ ಭಾರತ್ ರೈಲಿನ ವರ್ಣಚಿತ್ರವನ್ನು ಕೆತ್ತಲಾಗಿದೆ. ಜೊತೆಗೆ ರೈಲ್ವೆಯ ವಿದ್ಯುದೀಕರಣದ ಪ್ರಯಾಣವನ್ನು ಪ್ರತಿನಿಧಿಸುವ ಎಲೆಕ್ಟ್ರಿಕ್ ಲೋಕೋಮೋಟಿವ್ ವಿನ್ಯಾಸವನ್ನೂ ಇದರಲ್ಲಿ ಕಾಣಬಹುದು.

ಭಾರತದಲ್ಲಿ ಇದುವರೆಗೆ ವಿವಿಧ ರೀತಿಯ ನಾಣ್ಯಗಳು ಬಿಡುಗಡೆಯಾಗಿದ್ದರೂ, ವೈವಿಧ್ಯಮಯ ಬಣ್ಣಗಳಿಂದ ಕೂಡಿದ 100 ರೂಪಾಯಿ ನಾಣ್ಯ ಬಿಡುಗಡೆಯಾಗಿರುವುದು ಇದೇ ಮೊದಲು. ಕೋಲ್ಕತ್ತಾದ ಟಂಕಸಾಲೆಯಲ್ಲಿ ತಯಾರಾದ 35 ಗ್ರಾಂ ತೂಕದ ಈ ನಾಣ್ಯದಲ್ಲಿ ಶೇ. 50ರಷ್ಟು ಬೆಳ್ಳಿ, ಶೇ. 40ರಷ್ಟು ತಾಮ್ರ, ಶೇ. 5ರಷ್ಟು ನಿಕಲ್ ಮತ್ತು ಶೇ. 5ರಷ್ಟು ಸತು (Zinc) ಬಳಸಲಾಗಿದೆ. ಪುರಾತತ್ವ ಸಂಗ್ರಹಣೆಯಲ್ಲಿ ಆಸಕ್ತಿ ಹೊಂದಿರುವ ತೃಪ್ಪನಚ್ಚಿ ಎ.ಯು.ಪಿ ಶಾಲೆಯ ಶಿಕ್ಷಕ ಎಂ.ಸಿ. ಅಬ್ದುಲ್ ಅಲಿ ಅವರ ಸಂಗ್ರಹಕ್ಕೆ ಈ ಅಪರೂಪದ ನಾಣ್ಯ ಸೇರ್ಪಡೆಯಾಗಿದೆ.