ಇಸ್ರೋ ಪಿಎಸ್‌ಎಲ್‌ವಿ-ಸಿ 62 ಮಿಷನ್ ವಿಫಲ

ಶ್ರೀಹರಿಕೋಟ: 2026ರ ಇಸ್ರೋದ ಮೊದಲ ಬಾಹ್ಯಾಕಾಶ ಕಾರ್ಯಾಚರಣೆಯಾದ ಪಿಎಸ್‌ಎಲ್‌ವಿ-ಸಿ 62 (PSLV-C62) ಮೂರನೇ ಹಂತದಲ್ಲಿ ವಿಫಲವಾಗಿದೆ. ಬೆಳಿಗ್ಗೆ 10:17ಕ್ಕೆ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದ ಮೊದಲ ಉಡಾವಣಾ ವೇದಿಕೆಯಿಂದ ಉಪಗ್ರಹಗಳೊಂದಿಗೆ ಪಿಎಸ್‌ಎಲ್‌ವಿ ನಭಕ್ಕೆ ಚಿಮ್ಮಿತ್ತು. ಮೊದಲ ಎರಡು ಹಂತಗಳು ಯಶಸ್ವಿಯಾದವುಗಳಾದರೂ, ಮೂರನೇ ಹಂತದಲ್ಲಿ ಅನಿಶ್ಚಿತತೆ ಎದುರಾಯಿತು.

ಪಿಎಸ್‌ಎಲ್‌ವಿ-ಸಿ 62 ಅಂತಿಮ ಹಂತದಲ್ಲಿ ವಿಫಲವಾಗಿದೆ ಎಂದು ಇಸ್ರೋ ತನ್ನ ಎಕ್ಸ್ (ಟ್ವಿಟರ್) ಖಾತೆಯ ಮೂಲಕ ತಿಳಿಸಿದೆ. ಭೂ ವೀಕ್ಷಣೆಗಾಗಿ ಬಳಸಲಾಗುವ 'ಅನ್ವೇಷ' ಸೇರಿದಂತೆ ಒಟ್ಟು 16 ಪೇಲೋಡ್‌ಗಳು ಈ ಕಾರ್ಯಾಚರಣೆಯಲ್ಲಿದ್ದವು. 2025ರ ಮೇ ತಿಂಗಳ ವೈಫಲ್ಯದ ನಂತರ ಪಿಎಸ್‌ಎಲ್‌ವಿ ನಡೆಸಿದ ಪುನರಾಗಮನದ ಪ್ರಯತ್ನ ಇದಾಗಿತ್ತು. ಇಒಎಸ್ ಎನ್-1 (EOS N1) ಅನ್ವೇಷ ಉಪಗ್ರಹದೊಂದಿಗೆ ಪೋಲಾರ್ ಸ್ಯಾಟಲೈಟ್ ಲಾಂಚ್ ವೆಹಿಕಲ್, 14 ಸಹ-ಪ್ರಯಾಣಿಕ ಉಪಗ್ರಹಗಳನ್ನು ಸೂರ್ಯ-ಸಿಂಕ್ರೊನಸ್ ಕಕ್ಷೆಯಲ್ಲಿ ನಿಯೋಜಿಸಬೇಕಿತ್ತು. ಡಿಆರ್‌ಡಿಒದ ಇನ್ಸ್ಟ್ರುಮೆಂಟ್ಸ್ ರಿಸರ್ಚ್ ಮತ್ತು ಡೆವಲಪ್‌ಮೆಂಟ್ ಎಸ್ಟಾಬ್ಲಿಷ್‌ಮೆಂಟ್ ಅಭಿವೃದ್ಧಿಪಡಿಸಿದ ಹೈಪರ್‌ಸ್ಪೆಕ್ಟ್ರಲ್ ಭೂ ವೀಕ್ಷಣಾ ಉಪಗ್ರಹವೇ ಅನ್ವೇಷ.

ಇಸ್ರೋದ ವಾಣಿಜ್ಯ ವಿಭಾಗವಾದ ನ್ಯೂಸ್ಪೇಸ್ ಇಂಡಿಯಾ ಲಿಮಿಟೆಡ್ ಈ ಮಿಷನ್ ಕೈಗೊಂಡಿತ್ತು. ಭಾರತೀಯ ಕಂಪನಿ 'ಆರ್ಬಿಟ್ ಏಡ್' ನಿರ್ಮಿಸಿದ 'ಆಯುಲ್ ಸ್ಯಾಟ್' ಎಂಬ ಸಣ್ಣ ಉಪಗ್ರಹವೂ ಈ ಕಾರ್ಯಾಚರಣೆಯ ಭಾಗವಾಗಿತ್ತು. ಬಾಹ್ಯಾಕಾಶದಲ್ಲಿ ಉಪಗ್ರಹಗಳಿಗೆ ಇಂಧನ ತುಂಬಿಸುವ ತಂತ್ರಜ್ಞಾನವನ್ನು ಪರೀಕ್ಷಿಸುವುದು ಇದರ ಪ್ರಮುಖ ಗುರಿಯಾಗಿತ್ತು.