ಗುಂಪು ಹತ್ಯೆಗಳು ಸಂಸ್ಕೃತಿ ವಿರೋಧಿ: ಇಂಡಿಯನ್ ಗ್ರಾಂಡ್ ಮುಫ್ತಿ ಕಾಂತಪುರಂ ಉಸ್ತಾದ್

ಪಾಲಕ್ಕಾಡ್: "ಅನ್ನ ಕೇಳಿ ಬರುವ ಬಡ ಮನುಷ್ಯರನ್ನು ಹೊಡೆದು ಕೊಲ್ಲುವುದು ಅಮಾನವೀಯತೆಯ ಪರಮಾವಧಿ. ಗುಂಪು ಹತ್ಯೆಗಳು ಮತ್ತು ದೌರ್ಜನ್ಯಗಳನ್ನು ನಾಗರಿಕ ಸಮಾಜವು ಎಂದಿಗೂ ಸಹಿಸಬಾರದು," ಎಂದು ಭಾರತದ ಗ್ರಾಂಡ್ ಮುಫ್ತಿ ಕಾಂತಪುರಂ ಎ.ಪಿ. ಅಬೂಬಕರ್ ಮುಸ್ಲಿಯಾರ್ ಅವರು ತೀವ್ರವಾಗಿ ಖಂಡಿಸಿದ್ದಾರೆ. ಕೇರಳ ಯಾತ್ರೆಯ ಅಂಗವಾಗಿ ಒಟ್ಟಪಾಲಂನಲ್ಲಿ ನಡೆದ ಬೃಹತ್ ಸ್ವೀಕಾರ ಸಭೆಯಲ್ಲಿ ಮಾತನಾಡುತ್ತಿದ್ದ ಅವರು, ಮಾನವೀಯತೆಯ ಮೌಲ್ಯಗಳನ್ನು ಎತ್ತಿಹಿಡಿಯುವಂತೆ ಸಮಾಜಕ್ಕೆ ಕರೆ ನೀಡಿದರು.

ಮಾನವೀಯತೆಗೆ ಹೆಸರಾದ ಈ ಪವಿತ್ರ ಮಣ್ಣಿನಲ್ಲಿ ಕಳೆದ ತಿಂಗಳು ವಾಳೆಯಾರ್ ಮತ್ತು ಈ ಹಿಂದೆ ಅಟ್ಟಪ್ಪಾಡಿಯಲ್ಲಿ ನಡೆದ ಘಟನೆಗಳು ಅತ್ಯಂತ ನೋವಿನ ಸಂಗತಿಗಳಾಗಿವೆ. ಪ್ರತಿಯೊಬ್ಬ ಮನುಷ್ಯನಿಗೆ ಜ್ಞಾನ, ವಸ್ತ್ರ, ವಸತಿ ಮತ್ತು ನೆಮ್ಮದಿಯ ಬದುಕು ಸಿಗುವಂತೆ ಮಾಡುವುದು ಸಹಜೀವಿಗಳಾದ ನಮ್ಮೆಲ್ಲರ ಕರ್ತವ್ಯವಾಗಿದೆ. ಇವು ಕೇವಲ ಸಹಾಯವಲ್ಲ, ಬದಲಾಗಿ ಪ್ರತಿಯೊಬ್ಬರ ಜನ್ಮಸಿದ್ಧ ಹಕ್ಕುಗಳಾಗಿವೆ. ಈ ನಾಡು ನಮಗೆ ಎಷ್ಟು ಸೇರಿದ್ದೋ, ಅಷ್ಟೇ ಅವರಿಗೂ ಸೇರಿದೆ. ನಾವು ಶಾಂತಿಯನ್ನು ಬಯಸುವುದಾದರೆ, ಇತರರಿಗೂ ಆ ಶಾಂತಿಯುತ ಬದುಕನ್ನು ನೀಡುವ ಜವಾಬ್ದಾರಿ ನಮ್ಮ ಮೇಲಿದೆ. ಧರ್ಮ, ಅಭಿಪ್ರಾಯ ಮತ್ತು ಜೀವನದ ಸ್ವಾತಂತ್ರ್ಯವನ್ನು ಗೌರವಿಸುವುದು ಪ್ರಬುದ್ಧ ಸಮಾಜದ ಲಕ್ಷಣವಾಗಿದೆ.

ಮಣ್ಣಿನಲ್ಲಿ ಬೆವರು ಹರಿಸಿ ದುಡಿಯುವ ಕಾಯಕಯೋಗಿಗಳನ್ನು ನಾವು ಸದಾ ಗೌರವಿಸಬೇಕು. ಅವರ ಪರಿಶ್ರಮದಿಂದಲೇ ನಮಗೆ ನಿತ್ಯದ ಅನ್ನ ದೊರೆಯುತ್ತಿದೆ. ಹೀಗಿರುವಾಗ ಶ್ರಮಿಕರ ಮೇಲೆ ದೌರ್ಜನ್ಯ ಎಸಗುವುದು ಸಲ್ಲದು. ಮನುಷ್ಯನನ್ನು ಜನಾಂಗೀಯವಾಗಿ ಅಥವಾ ಯಾವುದೇ ಭೇದಭಾವದಿಂದ ನೋಡುವುದು ನಮ್ಮ ಸಂಸ್ಕೃತಿಗೆ ವಿರುದ್ಧವಾದದ್ದು. ಪ್ರತಿಯೊಬ್ಬರೂ ಈ ಮಣ್ಣಿನಲ್ಲಿ ಘನತೆ ಮತ್ತು ಗೌರವದಿಂದ ಬದುಕುವ ವಾತಾವರಣ ನಿರ್ಮಾಣವಾಗಬೇಕು. ಇದೇ ವೇಳೆ, ಕೇರಳದ ಅನ್ನದ ಕಣಜವಾದ ಪಾಲಕ್ಕಾಡ್‌ನ ರೈತರ ಪರವಾಗಿ ಮಾತನಾಡಿದ ಉಸ್ತಾದ್ ಅವರು, ಸರ್ಕಾರವು ಭತ್ತದ ಬೆಂಬಲ ಬೆಲೆಯನ್ನು ಹೆಚ್ಚಿಸಬೇಕು ಮತ್ತು ರೈತರಿಗೆ ನೀಡಬೇಕಾದ ಹಣವನ್ನು ವಿಳಂಬವಿಲ್ಲದೆ ಪಾವತಿಸಿ ಅವರನ್ನು ಸಂಕಷ್ಟದಿಂದ ಪಾರು ಮಾಡಬೇಕು ಎಂದು ಒತ್ತಾಯಿಸಿದರು.