ಬಿಹಾರ ಅಂತಿಮ ಹಂತದ ಮತದಾನಕ್ಕೆ ಭಾರಿ ಬಿಗಿ ಭದ್ರತೆ: ಮತದಾನ ಅಂತ್ಯದ ಬಳಿಕ ಸಂಜೆ ಮತಗಟ್ಟೆ ಸಮೀಕ್ಷೆ ಪ್ರಕಟ

Nov 11, 2025 - 10:56

ಹೊಸದಿಲ್ಲಿ: ರಾಜಕೀಯವಾಗಿ ಕುತೂಹಲ ಮೂಡಿಸಿರುವ ಬಿಹಾರ ವಿಧಾನಸಭೆ ಚುನಾವಣೆಯ ಎರಡನೇ ಹಾಗೂ ಅಂತಿಮ ಹಂತದ ಮತದಾನ ಮಂಗಳವಾರ ನಡೆಯಲಿದೆ. ಒಟ್ಟು 20 ಜಿಲ್ಲೆಗಳ 122 ವಿಧಾನಸಭಾ ಕೇತ್ರಗಳ ಮತದಾನಕ್ಕೆ ಸಕಲ ಸಿದ್ಧತೆ ಮಾಡಿಕೊಳ್ಳ ಲಾಗಿದೆ. 3.7 ಕೋಟಿ ಮತ ದಾರರು 1,302 ಅಭ್ಯರ್ಥಿಗಳ ರಾಜಕೀಯ ಭವಿಷ್ಯ ಬರೆಯಲಿದ್ದಾರೆ.

ಎರಡನೇ ಹಂತದ ಕದನದಲ್ಲಿಇಬ್ಬರು ಮಾಜಿ ಡಿಸಿಎಂಗಳು, 27 ಮಾಜಿ ಸಂಸದರು ಅದೃಷ್ಟ ಪರೀಕ್ಷಿಸಲಿದ್ದು, 136 ಮಹಿಳಾ ಅಭ್ಯರ್ಥಿಗಳು ರಾಜಕೀಯ ಭವಿಷ್ಯ ಅರಸಿದ್ದಾರೆ. ಒಬ್ಬ ತೃತೀಯ ಲಿಂಗಿ ಅಭ್ಯರ್ಥಿ ಸಹ ಕಣದಲ್ಲಿದ್ದಾರೆ.

ಔರಂಗಾಬಾದ್‌, ನವಾಡಾ, ಅರ್ವಾಲ್‌, ಜೆಹನಾಬಾದ್‌, ಮಧುಬನಿ, ಜಮೂಯಿ, ಭಭುವಾ, ಅರಾರಿಯಾ, ಭಾಗಲ್ಪುರ, ಬಂಕಾ, ರೋಹ್ಟಾಸ್‌, ಭಾಘಾ, ಸುಪೌಲ್‌ ಎರಡನೇ ಹಂತದಲ್ಲಿಮತದಾನ ನಡೆಯುವ ಪ್ರಮುಖ ಕ್ಷೇತ್ರಗಳಾಗಿವೆ.

ಭದ್ರತೆ ಮತ್ತಷ್ಟು ಹೆಚ್ಚಳ: ದಿಲ್ಲಿಸ್ಫೋಟ, ಹಲವು ರಾಜ್ಯಗಳಲ್ಲಿ ಶಂಕಿತ ಉಗ್ರರ ಬಂಧನ ಹಿನ್ನೆಲೆಯಲ್ಲಿ ಚುನಾವಣೆ ನಡೆಯುವ ಜಿಲ್ಲೆಗಳಲ್ಲಿ ಭದ್ರತೆ ಹೆಚ್ಚಿಸಲಾಗಿದೆ. ಉಗ್ರ ನಿಗ್ರಹ ಪಡೆಗಳು, ವಿಶೇಷ ಕಾರ್ಯಪಡೆ ಯೋಧರು, ಕ್ಷಿಪ್ರ ಕಾರ್ಯಪಡೆ ಪೊಲೀಸರನ್ನು ಭದ್ರತೆಗೆ ಬಳಸಿಕೊಳ್ಳಲಾಗಿದೆ. ರಾಜ್ಯದ 60 ಸಾವಿರ ಪೊಲೀಸರ ಜತೆಗೆ ಅರೆಸೇನಾಪಡೆಗಳ 4 ಲಕ್ಷ ಯೋಧರನ್ನು ನಿಯೋಜಿಸಲಾಗಿದೆ. ಅತಿ ಸೂಕ್ಷ್ಮ ಮತಗಟ್ಟೆ ಎಂದು ಗುರುತಿಸಲಾದ 8,491 ಮತಗಟ್ಟೆಗಳಲ್ಲಿ ಹೆಚ್ಚುವರಿ ಭದ್ರತಾ ಪಡೆಗಳನ್ನು ನಿಯೋಜನೆ ಮಾಡಲಾಗಿದೆ.

ಇಂದು ಮತಗಟ್ಟೆ ಸಮೀಕ್ಷೆ: ಬಿಹಾರ ಚುನಾವಣೆಯ ಬಹು ನಿರೀಕ್ಷಿತ ಮತಗಟ್ಟೆ ಸಮೀಕ್ಷೆ ಮಂಗಳವಾರ ಸಂಜೆ ಮತದಾನ ಅಂತ್ಯದ ಬಳಿಕ ಪ್ರಕಟವಾಗಲಿದೆ. ವಿವಿಧ ಸುದ್ದಿಸಂಸ್ಥೆಗಳು ನಡೆಸಿರುವ ಮತಗಟ್ಟೆ ಸಮೀಕ್ಷೆಯನ್ನು ಪ್ರಕಟಿಸಲಿವೆ.

ಎರಡನೇ ಹಂತದ ಚುನಾವಣೆಯ ವಿವರಗಳು ಹೀಗಿವೆ: - 20 ಜಿಲ್ಲೆಗಳು
- 122 ಕ್ಷೇತ್ರಗಳು
- 1,302 ಅಭ್ಯರ್ಥಿಗಳು
- 3.7 ಕೋಟಿ ಮತದಾರರು
- 45,399 ಮತಗಟ್ಟೆಗಳು

ಪಕ್ಷವಾರು ಸ್ಪರ್ಧೆಯ ವಿವರ:
- ಬಿಜೆಪಿ: 53 ಸ್ಥಾನ
- ಜೆಡಿಯು: 44 ಸ್ಥಾನ
- ಎಲ್‌ಜೆಪಿ: 15 ಸ್ಥಾನ
- ಎಚ್‌ಎಎಂ: 06 ಸ್ಥಾನ
- ಆರ್‌ಎಲ್‌ಎಂ: 04 ಸ್ಥಾನ
- ಆರ್‌ಜೆಡಿ: 71 ಸ್ಥಾನ
- ಕಾಂಗ್ರೆಸ್: 37 ಸ್ಥಾನ
- ವಿಐಪಿ: 08 ಸ್ಥಾನ
- ಎಡಪಕ್ಷ: 11 ಸ್ಥಾನ
- ಜೆಎಸ್‌ಪಿ: 120 ಸ್ಥಾನ